W dźensnišim 74. plenarnym posedźenju Sakskeho krajneho sejma buštej 5. rozprawa Sakskeho statneho knježerstwa wo połoženju serbskeho ludu a rozprawa wo dźěławosći Rady za serbske naležnosće w Swobodnym staće Sakskej za lěće 2016 a 2017 wobjednanej.Předsyda Domowiny Dawid Statnik praji k tomu: “Witamy diskusiju a přiwzaće wobeju rozprawow we wuběrkomaj a plenumje. Prěni raz mějachu wšitcy zajimcy móžnosć, zjawnemu wobjednanju we wuběrku za wědomosć, wysoke šule, kulturu a medije slědować. To pokaza nam, zo su naležnosće serbskeho ludu tež w Drježdźanach wažna naležnosć. Dźakujemy so Sakskemu krajnemu sejmej a sakskemu knježerstwu za jich angažement k škitej a spěchowanju našeje rěče, kultury a identity.”W běhu dźensnišeje plenarneje debaty namjetowachu jednotliwi zapósłancy, serbski lud na bazy dobrowólnosće ličić dać. Statnik k tomu: “Wotpokazamy tajke ličenje luda, wšojedne hač winowatostne abo dobrowólne, a pokazamy na Sakski serbski zakoń a w nim zakótwjenu swobodu wuznaća.” “Njehladajo toho”, tak Statnik dale, “starosća nas šulerske ličby w ramiku koncepta 2plus. Hačrunjež je cyłkowna ličba šulerkow a šulerjow złaha stupaca, zwěsćamy, zo spaduje ličba serbsko-maćernorěčnych šulerkow a šulerjow widźomnje. Tole so tež přez zhubjenje serbskich rěčnych rumow – w šulskej rjadowni, w zjawnosći a w zarjadach – pospěši. Tohodla ma so hnydomnje jednać a mjez druhim prašenje šulskeho kubłanja znowa přemyslić. Trjebamy cyłotny spěchowanski přistup (ně.: Förderansatz), zo njebychmy serbšćinu jenož zdźerželi, ale tež spěchowali a ju dale wuwić móhli, tak, kaž to wustawa Sakskeje předpisa. Wjeselimy so, zo su nam krajej Sakska a Braniborska kaž tež Zwjazk při tym po boku.”