Serbski gymnazij załoži so 1. septembra 1947 jako „Serbska wyša šula“ w Budyšinje. Wotewrjenje wotmě so 8. septembra 1947. Šulske twarjenje běše na Kurta-Pchalekowej 15. Składnostnje dźensnišeje 75. róčnicy wotewrjenja šule su tež předsydu Domowiny, Dawida Statnika přeprosyli, so na swjatočnosći słowa jimać. Tež Delnjoserbski gymnazij w Choćebuzu budźe kónc tydźenja swjećić – jubilej 70 lět šule, zhromadnje z lětušej schadźowanku w Delnjej Łužicy.

Dawid Statnik, předsyda Domowiny, so składnostnje 75 lět Serbskeho gymnazija w Budyšinje wupraja:

„Je jenički gymnazij na swěće, kiž wuwučuje hornjoserbšćinu na maćernorěčnym niwowje. Šula je tohodla dobry partner za nas, tež w zwisku z internatom Rěčneho centruma Witaj (RCW) w nošerstwje Domwoiny. Wokrjes a stat stej dotal nadawk wustawy za tutu šulu swěru spjelniłoj a wočakujemy, zo tomu tež přichodnje tak budźe.

My sej přejemy, zo so serbskim přidružnikam přistup do wučerstwa na serbskich šulach wolóža a problemy w šulerskim transporće stajnje na dobro serbskich swójbow rozrisuja. Kraj a wokrjes njech sej wuznam a wažnosć serbskosće za profil regiona hišće bóle wuwědomitej. Kóždy wotpokazany šuler móže w přichodźe pobrachowacy serbski wučer być. Wučerki a wučerjo su twarcy serbskeho naroda. Cyle po prajidmje Jakuba Barta-Ćišinskeho: ,Rěč wótcow serbskich a jich swěru kruće hajće.’ Tohodla prosymy jich wo konsekwentne nałožowanje našeje maćeršćiny.

Wuměna z delnjoserbskim gymnazijum w Choćebuzu, ze serbskimi institucijemi a z druhimi narodnymi mjeńšinami su bytostne stołpy gymnazija ze žiwym narodnym wědomjom. Jako dar sym pjeć bulow přinjesł – pak za geometriju pak za sport. Tež jako znamjo dynamiki. Gymnaziasća su hižo dotalnu digitalizaciju serbšćiny jara angažowanje podpěrali a woni budu tež přichod serbskich institucijow sobu zaručeć. W tutym zmysle: do dźěła zdar!”