Źinsa su se zmakali cłonki prezidiuma Domowiny na swójo 38. rědne pósejźenje w aktualnej wólbnej perioźe. Tak su wobradowali wó prědnem pśiwitanju Domowiny, kenž buźo stwórtk, 21. nowembra 2024 w Lubinje. Wócakuju wěcej ako 80 gósći  z politiki a towarišnosći, z Bramborskeje ako teke ze Sakskeje.

Dalej su pśichodne pósejźenje zwězkowego pśedsedaŕstwa pśigótowali, kótarež buźo 29.11.24 w Jakubec wustawje w Kulowje. Mimo togo su delegěrowanja wobzamknuli.

Delegěrowanja

Lena Hauptmannojc wobźělijo se w mjenju Serbow na spiwnem wuběźowanju mjeńšynow “LIET International” wót 21.-23.11.2024 na Korsika. LIET International jo mjazynarodne wuběźowanje za modernu muziku w regionalnych a mjeńšynowych rěcach. Zaměr LIET jo, rěcnu a kulturnu wjelerakosć Europy spěchowaś a rěcam, kótarež dostanu cesto mało medialnu zajmowanosć, wěcej widobnosći pósćiś.

Dalej jo prezidium na naraźenje župy Dolna Łužyca Marcusa Końcarja ako zastupnika Serbow do rozgłosoweje rady rbb na cas 2025-2029 delegěrował. Rozgłosowa rada doglědujo zastupujucy za wobydlaŕki a wobydlarjow krajowu Bramborska a Barliń programowe dopołnjenje nejwažnjejšego a nejwětšego regionalnego medijowego doma. Bazěrujucy na § 4a Serbskeje kazni wót 1994 ma Domowina ako kšywowy zwězk serbskich zwězkow a towaristwow w Bramborskej pšawo, cłonka do rozgłosoweje rady pósłaś.

Prezidium jo zastupujucego pśedsedarja Domowiny dr. Hartmuta Leipnera, głownu jadnaŕku Domowiny Judit Šołćinu ako teke referenta Clemensa Škodu na 27. seminar słowjańskich mjeńšynow w Europje (FUEN) delegěrował, kótaryž wótmějo se wót witśego do 17.11.2024 w Košicach (Słowakska) pla českeje mjeńšyny.