Na swojim dźensnišim posedźenju je so prezidij Domowiny mjez druhim z přihotom přichodneho schadźowanja zwjazkoweho předsydstwa (ZP) zaběrał, kotrež budźe 17. nowembra 18.00 hodź. w Kulturnej fabrice we Wojerecach.

Na poslednim posedźenju ZP tutoho lěta změja čłonojo hišće tróšku dźěła. Na nich čaka diskusija wo nowym myće za hospodarstwo, kotrež chce Domowina za přikładne spěchowanje serbskeje rěče we wobłuku hospodarstwa wot klětušeho spožčić. Za to je wuběrk za naležnosće změny strukturow, hospodarstwo a infrastrukturu pozadki a namjety nadźěłał, kotrež budu čłonojo ZP w dźěłarničkach diskutować.

Zastupjerjo župneho předsydstwa Wojerowskeje župy “Handrij Zejler” budu jako hosćo aktualnu situaciju w regionje předstajić.

Na dnjowym porjedźe steji dale wothłosowanje planowanja posedźenjow gremijow w lěće 2024. Dźěłowy plan předwidźi klětu jědnaće posedźenjow prezidija a šěsć zwjazkoweho předsydstwa. ZP ma namjet přichodny tydźeń schwalić.