Překwapjenku dožiwichu dźensa šulerki a šulerjo 5. lětnika Serbskeje wyšeje šule Ralbicy. Woni smědźachu we wučbje hrajo dožiwić, kotre městnosće UNESCO nam naša Łužica skića. Nawodnica projekta „Namrěwstwo Łužicy“ (UNESCO 5) Susann Troppa poby dźensa zhromadnje z referentom Domowiny Clemensom Škodu w Ralbicach, zo by memory-hru přepodała. We wučbnej hodźinje su wuknjace a wuknjacy šulski material hnydom wuspytali a sej tak mnohostronske herbstwo Łužicy hrajo wotkryli.

„Je wulkotnje widźeć, kelko wjesela dźěći při hraću a hódanju mějachu. Rjenje je tež, kelko wědy wo namrěwstwje Łužicy smy w běhu šulskeje hodźiny zabawnje posrědkować móhli.“ zjima Susann Troppa prěni test w praksy šulskeho paketa „Serbšćina zetka namrěwstwo Łužicy“.

Nimo memohry přepoda Susann Troppa nawodnicy wyšeje šule Mileni Koberowej kaž tež UNESCO-koordinatorce šule Francisce Wróblowej wjacore wudaća serbskeho dźěćaceho časopisa Lutki z informacijemi wo UNESCO-městnach, kotrež wudawa Rěčny centrum Witaj.

Po tym wuměnichu so partnerojo hišće wo dalšim zhromadnym dźěle. Memo-hra je so tež we wulkoformaće produkowała a móže so wot šulow pola wjednistwa projekta wupožčić. Do přichoda je planowane, na webstronje projekta wobłuk kubłanje wučerkam a wučerjam informacije a materialije k dispoziciji stajić.

„My jako UNESCO-šula móžemy so z projektom „Namrěwstwo Łužicy“ identifikować a wjeselimy so, zo smy dalšeho partnera zeznali, z kotrymž chcemy hromadźe dźěłać.“, tak Franciska Wróblowa. Jako prěnje konkretne naprawy kooperacije planuja dalekubłanja wučerjow wo UNESCO-městnosćach a wo imaterielnym kulturnym herbstwje Łužicy kaž tež zhromadne dźěło we wobłuku 50lětneho šulskeho jubileja klětu.

Serbska wyša šula Ralbicy je jenička serbskorěčna projektna šula UNESCO a angažuje so předewšěm za hajenje materielneje a imaterielneje serbskeje kultury. Lětsa woswjeći swój 40lětny jubilej jako čłonka zwjazka UNESCO.

Informacije pod www.erbe-lausitz.eu

Foto: Domowina/Božena Šimanec