Wolóženy reagowaše předsyda Domowiny, Dawid Statnik, na powěsć hamtskeho sudnistwa z Drježdźan, zo su wšitke změny wustawkow třěšneho zwjazka přiwzali a zapisali. Statnik informuje w lisće wo tym čłonow zwjazkoweho předsydstwa, wšě předsydstwa čłonskich towarstwow a župow a so zjawnje wupraja:

„Odyseja zašłeju lětow je zakónčena. Domowina ma wobkrućene nowe wustawki. Z tym běše lětuša wurjadna hłowna zhromadźizna wuspěšna, kiž měješe hišće wotewrjene prašenja ze stron sudnistwa po lońšej hłownej zhromadźiznje zrjadować. To je so nam radźiło. Dźakuju so wšěm delegatam za jich sćerpnosć a wšěm, kotřiž su nam z dobrej radu poboku byli.

Z nowymi wustawkami smy digitalnym a hybridnym posedźenjam gremijow dołhodobny porjadny prawniski zakład dali. Njewotwisnje wot lockdownow pandemije dla je dźensniši dźeń zmysłapołne, wšěm wolenym Domowinjanam tež wobdźělenje na digitalnym puću zmóžnjeć. Tež prawa jednotliwcow jako čłonow Domowiny smy zesylnili. Tohodla su naše nowe wustawki zdobom wizitka načasneje narodneje organizacije.

W jednaćelstwje Domowiny je so tohorunja něšto změniło: Zastupowacy jednaćel z Delnjeje Łužicy Marcus Końcaŕ je wotnětka jednaćel a dotalna jednaćelka Judit Šołćina je hłowna jednaćelka. To woznamjenja zwyšenje statusa jednaćelnje w Choćebuzu. Wustawki su transparentnje w interneće přistupne: https://www.domowina.de/hsb/domowina/wustawki-prawniske-predpisy/wustawki-domowiny .”