Na swojim dźensnišim posedźenju podachu so čłonojo prezidija na wopyt k předewzaću TDDK - twornju za němske klimowe kompresory w Nadróznej Hrabowce. Woni wotpowědowachu tak přeprošenju prezidenta a jednaćela TDDK, Yoichi Terao. Firma produkuje klimowe procesory za wosobowe awta.

“Najebać wšelakorosće kulturow, kotrež so pola nas zetkaja, zhotowja wšitcy zhromadnje jednotny produkt”, tak jednaćel Yoichi Terao. W srjedźišću tuteje wšelakorosće stejitej tež serbska kultura a rěč. Nic jeno bu prezidij ze solom a chlěbom witany, ale samo z překwapjenku: z nowej dwurěčnej brošurku zawoda pod titulom “technika, tradicija a wizija”.

“Z tym njepokaza zawod, kotryž leži na kromje serbskeho sydlenskeho ruma, jenož wotewrjenosć a zhromadnosć, ale tež zamołwitosć serbskej rěči a serbskemu ludej napřećo”, wuzběhny předsyda Domowiny Dawid Statnik. “To kryje so ze hesłami Domowiny: zamołwitosć, wotewrjenosć a zhromadnosć.”

Dale měješe Domowinska delegacija składnosć, sej zawod TDDK wobhladać. Serbske wjedźenje přewzachu Dominik Knop, Susann Suchowa a Carolina Měršowa, zamołwita za serbske naležnosće.

Na to přewjedźe prezidij swoje 34. posedźenje. Tema běchu mjez druhim wólby Rady nastupnosći Serbow pśi Bramborskej krajnem sejmje, kotrež buchu njedawno zahajene. Informacije wo tutej su na Domowinskej webstronje wozjewjene. Dale přihotowachu prěnje předłohi za přichodne posedźenje Zwjazkoweho předsydstwa Domowiny, kotrež ma so zaběrać na přikład z powołanjemi do fachoweje přirady RCW abo ze zwołanjom klětušeje hłowneje zhromadźizny Domowiny dnja 5.4.2025.

Přichodne posedźenje prezidija budźe 20. awgusta 2024.

Fota (Domowina/Božena Šimanec): Wjedźenje w serbskej rěči přez zawod přewza sobudźěłaćer TDDK Dominik Knop.