Sylny hłós za Serbow - Dawid Statnik w zastojnstwje wobkrućeny

Na dźensnišej 23. hłownej zhromadźiznje Domowiny wuzwolichu delegaća Dawida Statnika znowa za předsydu Domowiny. Nowa městopředsydka je Marlis Młynkowa a dr. Hartmut Leipner wostanje na dalše 4 lěta městopředsyda třěšneho zwjazka. Nowemu zwjazkowemu předsydstwu přisłuša zdobom dalšich 24 čłonow, mnozy z nich kandidowachu prěni raz za tutu funkciju (mjena hlej deleka).

Předsyda Dawid Statnik wuzběhny we swojej rozprawje wo dźěławosći Domowiny w minjenjomaj lětomaj jasny zaměr: „Hač do 2100 chcemy 100.000 serbsce rěčacych docpěć – to jenož zhromadnje zdokonjamy. Kóždy je prašany, so za zachowanje našeje rěče zasadźeć.“

Prěni raz móžachu so delegatki a delegaća wo dźěławosći a projektach poslednimaj lětomaj interaktiwnje informować. W pjeć wšelakich rumnosćach móžachu z čłonami prezidija kaž tež zarjadom Domowiny do rozmołwy přińć.

Mjez hosćimi běše tež Budyski wyši měšćanosta Karsten Vogt, kotryž přitomnych postrowi. Vogt chwaleše angažement Domowiny a wupraji so za dalše dowěrliwe a wuske zhromadne dźěło. Nimo toho předstaji njedawno nowu wuzwolenu přiradu za serbske naležnosće města Budyšina, kotraž chce so za to zasadźeć, zo je serbska rěč w přichodźe w zjawnosći bóle widźomna.

Franziska Brechowa, nawodnica wobłuka kultura a turizm w Sakskim statnym ministerstwje za wědomosć, kulturu a turizm, zwurazni w postrownych słowach ministerskeho prezidenta Michaela Kretschmera dalšu podpěru za serbski lud. Wona připowědźi wotpohlad, so za zwyšenje financnych srědkow serbskeho ludu zasadźować. Tež dalše jasne znamjo wona připowědźi: statne knježerstwo zarjaduje městno za krajnu społnomócnjenu za serbske naležnosće.  Srjedź apryla Brechowu do tuteje funkcije powołuja. Z tym so tež žadanje serbskeho ludu spjelni.

Mjez dalšimi čestnymi hosćimi běchu zapósłanča a zapósłanc Zwjazkoweho sejma Kathrin Michel (SPD) a Florian Oest (CDU), zapósłancy Sakskeho krajneho sejma Marko Šiman (CDU; zdobom předsyda parlamentariskeje přirady Załožby za serbski lud), Gerald Eisenblätter a Laura Stellbrink (SPD), Elaine Jentsch (CDU), Ines Biebrach (BSW), Rico Gebhardt (Lěwica), čłonojo Rady za serbske naležnosće Swobodneho stata Sakskeje kaž tež čłonojo Rady za nastupnosći Serbow w Bramborskej, předsyda Załožboweje rady Marko Kowar kaž tež direktor Załožby za serbski lud Jan Budar, přirjadnica krajneho rady w Budyskim wokrjesu Dr. Romy Reinisch, społnomócnjene za serbske naležnosće wokrjesow Zhorjelc (Kati Strukowa), Gorne Błota-Łužyca (Hanka Rjelcyna) a Sprjewja-Nysa (Romy Ruffowa). Z Prahi bě předsyda Společnosti přátel Lužice Lukáš Novosad a z Wrocławja předsyda Towarzystwa Polsko-Serbołużyckie Piotr Gaglik přichwatał. Nimo toho móžachmy něhdyšeho předsydu Domowiny Jana Nuka witać.

Zhromadźiznu je profesionalny balet Serbskeho ludoweho ansambla, kotryž bě lětsa hosćićel hłowneje zhromadźizny Domowiny, zahajił. Prjedy hač so zhromadźizna swjatočnje ze zanjesenjom serbskeje hymny zakónči, hišće młodźi rejwarjo skupiny „Łužičanska rapsodija“ delegatow z temperamentnymi rejemi zwjeselichu.

Konstituowace posedźenje noweho zwjazkoweho předsydstwa budźe hižo přichodny pjatk, 11.04.2025 w Budyšinje.

Nowe čłonki a nowi čłonojo Zwjazkoweho předsydstwa Domowiny

Franciska Albertowa - Župa Dolna Łužyca z.t.

Maksimilian Hasacki - Župa Dolna Łužyca z.t.

Angela Šurmanowa - Župa Dolna Łužyca z.t.

Mira Dubianojc - Župa Dolna Łužyca z.t.

Šarlota Kušcyc - Župa Dolna Łužyca z.t.

Joachim Glücklich - Župa "Handrij Zejler" Wojerecy

Jan Ryćer - Župa "Jan Arnošt Smoler" Budyšin

Diana Wowčerjowa - Župa "Michał Hórnik" Kamjenc

Michaela Wróblowa - Župa "Michał Hórnik" Kamjenc

Carolina Měršowa - Župa "Michał Hórnik" Kamjenc

Kati Strukowa - Župa Jakub Lorenc-Zalěski z.t.

Alena Hiccyna - Serbske šulske towarstwo z.t.

Tomaš Suchy - Serbski Sokoł z.t.

Měrćin Brycka - Spěchowanski kruh za serbsku ludowu kulturu z.t.

Jěwa-Marja Čornakec - Towarstwo za spěchowanje SLA z.t.

Marko Hančik - Towarstwo Cyrila a Metoda z.t.

Roman Dźisławk - Towarstwo Cyrila a Metoda z.t.

Jan Bělk - Towarstwo za spěchowanje serbskeho kulturneho a informaciskeho srjedźišća w Barlinje SKI z.t.

Beno Bělk - Zwjazk serbskich spěwarskich towarstwow z.t.

Bjarnat Cyž - Zwjazk serbskich rjemjeslnikow a předewzaćelow z.t.

Syman Hejduška - Zwjazk serbskich wuměłcow z.t.

Jan Klimann - Serbske młodźinske towarstwo Pawk z.t.

Matej Mark - Zwjazk serbskich studowacych – Župa „Jan Skala”

Bosćij Benada - Zwjazk za serbski kulturny turizm z.t.

Nimo toho wuzwolichu delegaća tež rewizijny a změrcowski wuběrk.

Rewizijnemu wuběrkej přisłušeja Gabriela Linakowa, Jan Kliman, Lubina Dučmanowa a Tadej Cyž.

W změrcowskim wuběrku skutkuja wotnětka Damian Dyrlich, dr. Annett Brězanec, dr. Daniel Měrćink, Leńka Thomasowa a Jonas Nowak.