Jutře, 05.04.2025 w 9hodź., wotměje so 23. Hłowna a wólbna zhromadźizna Domowiny w Serbskim ludowym ansamblu w Budyšinje, informacije namakaće na našej webstronje a štóž chce w zahrodce dźěłać a při wšěm wo wuslědkach zhonić, njech sćěhuje naše žiwe wusyłanje na našim kanalu na youtube.

+++

„Što rěka tu mjeńšina?“ – wustajeńca w Serbskim muzeju

Njedźelu 6. apryla 2025 w 15hodź. wotewrě Serbski muzej Budyšin pućowacu wustajeńcu „Što rěka tu mjeńšina?”. Zajimče a zajimcy su wutrobnje přeprošeni.

Wustajeńca pokaza stawizny a zdobom žiwu eksistencu štyri awtochtonych narodnych mjeńšinow a ludowych skupin w Němskej – Danow, Frizow, Serbow a němskich Sinti a Romow kaž tež rěčnicu skupinu delnjoněmčinu. Po starće w lěće 2022, so tuta nětko prěni raz w Sakskej wustaja.

Za wuwučowacych kaž tež šulske rjadownje wot 9. lětnika maja přidatnje wučbny material. Wustajeńca budźe wot 6.4. do 11.6.2025 w Budyšinje. Wo ramikowym programje kaž tež wotewrjenskich časach zhoniće w lětaku (hlej přiłoha).

Wustajeńca je zhromadny projekt Mjeńšinoweje rady štyrjoch awtochtonych narodnych mjeńšin a ludowych skupin Němskeje kaž tež Zwjazkoweje rady för Nedderdütsch a bu jako pućowaca wustajeńca koncipowana. Mjeńšinowy sekretariat, kotryž je w nošerstwje Domowiny – Zwjazka Łužiskich Serbow, koordinuje wustajeńcu. Projekt so přez Zwjazkowe ministerstwo nutřkowneho a domiznu spěchuje.

www.washeißthierminderheit.de | www.minderheitensekretariat.de

+++

Terminy (wuběr) z protyčki 07.04. do 12.04.2025 

njedźelu, 06.04.2025 

• 15:00 hodź. wotewrjenje wustajeńcy “Što rěka tu mjeńšina?” w Serbskim muzeju Budyšin, postrowne słowa mj. dr. předsyda Domowiny Dawid Statnik 

wutoru, 08.04.2025  

• 17:00 –20:00 hodź. zarjadowanje “Serbske jejka za zahrodku” w bróžni Domowinskeho domu we Wojerecach, informacije poda po naprašowanju Marija Šołćic, rěčna motiwatorka projekta ZARI 

• 17:00 hodź. dźěłarnička hotowanja rejowanskeje drasty ewangelskich Serbow Budyskeho kraja w Serbskim domje w Budyšinje, informacije poda po naprašowanju Sonja Hrjehorjowa, nawodnica kulturneho wobłuka projekta ZARI 

• 18:00 hodź. přijeće Zwjazka wuhnatych w Berlinje, předsyda Dawid Statnik so wobdźěli 

  štwórtk, 10.04.2025  

• “Serbske jejka za zahrodku”, w Přiwćicach, na Knježim dworje 7, wot 19 do 20 hodź., informacije poda po naprašowanju Marija Šołćic, rěčna motiwatorka projekta ZARI 

 pjatk, 11.04.2025   

• 16:30 hodź. konstituowace posedźenje noweho Zwjazkoweho předsydstwa Domowiny w Serbskim domje, hosćo su lubje witani, posedźenje so na našim youtube-kanalu wusyła, informacije poda: Božena Šimanec 

• 19:00 hodź. “Serbske jejka za zahrodku”, w Ptačecach (w gmejnskej cyrkwinskej stwě), informacije poda po naprašowanju Marija Šołćic, rěčna motiwatorka projekta ZARI 

sobotu, 12.04.2025  

• 9:30 hodź. Serbske nalětnje pućowanje, zetkanišćo: kružny wobjězd při Němsko-Serbskim šulskim kompleksu w Slepom, dalše informacije poda na naprašowanje rěčna motiwatorka ZARI-projekta Juliana Kaulfürstowa