Wčera wobzamkny gmejnska rada Wóslink, zo maja so sydom z dźewjeć wjesnych dźělow gmejny Serbskemu sydlenskemu rumej přizamknyć. 

“Wjeselu so, zo smy dźensa jednohłósny, pozitiwny rozsud tworili. W gmejnje mamy serbsce rěčacych wobydlerkow a wobydlerjow. Jich kulturna identita so respektuje. Zhromadnje pěstujemy serbske tradicije, kaž mejestajenje abo camprowanje. Nimo toho poskića so wučba serbšćiny na swobodnych křesćanskich šulach we Wóslinku.“, tak wjesnjanosta Johannes Nitzsche.

Za rozšěrjenje Serbskeho sydlenskeho ruma je trěbna změna přiłohi Sakskeho serbskeho zakonja. Domowina budźe gmejnu Wóslink při tutym procesu podpěrać.

„Dźakuju so gmejnskej radźe kaž tež wjesnym radam za wčerawše wotewrjene poradźowanje a za pozitiwne wobzamknjenje. Tute wuznaće k serbskej rěči, kulturje a stawiznam je wažne za skrućenje našeje dwurěčneje zhromadnosće we Łužicy“, tak předsyda Domowiny Dawid Statnik, kotryž je so na wčerawšim posedźenju wobdźělił.

Zakład wobzamknjenja gmejnskeje rady su mjez druhim rozmołwy we wjesnych radach a naprašowanje w Debricach, na kotrymž su wobydlerjo podali, zo pěstuja serbsku kulturu a rěč. Nimo toho chodźa někotre dźěći gmejny na Serbsku wyšu šulu susodneje gmejny Ralbicy-Róžant.