Čłonojo Zwjazkoweho předsydstwa Domowiny (ZPD) wobzamknychu na swojim dźensnišim wuradźowanju w Budyšinje, zonjemóža zastupjerjo gremijow třěšneho zwjazka Domowiny runočasnje funkcionarojo abo kandidaća ekstremistiskich stronow abo skupinow być. Z toho slěduje, zo njemóža zastupjerjo gremijow třěšneho zwjazka Domowiny runočasnje funkcionarojo abo kandidaća Alternatiwy za Němsku (AfD) abo někajkeježkuli druheje ekstremistiskeje strony abo skupiny być. 

Čłonojo, kotřiž politisku dźěławosć za AfD abo druhu ekstremistisku stronu abo skupinu přewozmu abo za tutu stronu k wólbam kandiduja, so awtomatisce z čłonstwa gremijow třěšneho zwjazka Domowiny wuzamknu. Rjadowanje płaći wot 07.06.2024 za wšitkich nětčišich a přichodnych čłonow gremijow Domowiny.

Domowina zasadźuje so za zajimy serbskeho ludu, za politiske připóznaće kaž tež za zdźerženje a spěchowanje serbskeje rěče, kultury a identity. Ekstremizm kóždehožkuli razu so politiskim zasadam Domowiny znapřećiwja. Zakład je, zo je wustawowy škit w Sakskej stronu AfD jako wěsće prawicarskoekstremistisku zastopnjował. Diskusija měła so w župach a towarstwach dale wjesć.

ZP Domowiny žada sebi nětčišu serbsku rjadownju 3. lětnika na Serbskej zakładnej šuli “Dr. Marja Grólmusec” Radwor zdźeržeć. Tam ma so w nowym šulskim lěće rjadownja ze 6 maćernorěčnymi dźěćimi do noweho rjadowniskeho cyłka z dohromady 25 šulerjemi zarjadować. Starši potrjechenych serbskich šulerjow kaž tež čłonojo Staršiskeje iniciatiwy Radwor z.t. su Domowinu a Serbske šulske towarstwo wo podpěru prosyli, dwě rjadowni w 4. lětniku zachować.

Krajny zarjad za šulu a kubłanje (Lasub) sćele serbskich wučerjow na druhe šule bjez serbskeho poskitka, zo bychu tam wučbu zaručili. Na wšitkich šulach, kotrež po koncepće 2plus wuwučuja, njeje wučerjow w dosahacej měrje. Z tym njehodźa so hižo wšitke móžnosće koncepta 2plus přesadźić. Spěchowanje serbsce wuknjacych a serbskich šulerjow so dźeń a bóle wohroža.

ZP Domowiny potwjerdźi žadanja Serbskeho šulskeho towarstwa z dnja 15.12.2023 za skrućenje serbskeho šulstwa w Sakskej. Čłonojo zwjazkoweho předsydstwa žadaja, zo maja serbscy wučerjo na serbskich šulach wuwučować. Zdźerženje, spěchowanje a dalewuwiće serbšćiny  je wohrožene. Mjeńšinowy škit wužada přidatne prócowanja sakskeje politiki. Wobsadźenje městna koordinatora za serbske šulske naležnosće pola Krajneho zarjada z šulu a kubłanje so dale dlije. To je njeznjesliwa situacija. “Nochcemy přihladować, zo so serbske šulstwo dale demontuje”, tak předsyda Dawid Statnik.

Dale su čłonojo Zwjazkoweho předsydstwa Domowiny porjad za spožčenje “Myta za hospodarstwo” schwalili. Wosebite myto chcedźa za wusahowace a přikładne spěchowanje serbskosće w hospodarstwje spožčić. Dale chcedźa za přikładnu serbšćinu w tutym wobłuku připóznaće spožčić. Zdobom schwalichu čłonojo ZP wólbny porjad Domowiny. Tutón so na přichodnej hłownej zhromadźiznje Domowiny klětu doskónčnje wobzamknje. Přičina je, zo njebě dotal powšitkowneho płaćiweho porjada, kiž za wšitke wólby Domowiny płaći.

Za wólbnu dobu kraja Sakskeje 2024-2029 namołwja gremij serbske župy, towarstwa, cyłki a jednotliwcow hač do 15.08.2024 kandidatow za wólby do noweje Rady za serbske naležnosće Sakskeje namjetować. Domowina jako třěšny zwjazk přewozmje znowa nadawk kandidatow nominować. Kandidaća předstaja so na zjawnym posedźenju Zwjazkoweho předsydstwa Domowiny 27. septembra.

Čłonojo ZP Domowiny su namjet programoweje komisije na wědomje brali a daja z tym 2. naćisk programa Domowiny do zjawneje diskusije. Dotal zapodate 9 namjetow su wuběrkownicy zadźěłali.