Tučasnje přebywa 20 zastupjerjow 14 narodnych mjeńšin na dźěłowym zetkanju “non-kin state” (bjez maćerneho kraja) w španiskim měsće Tarragona, w juhu Katalanskeje. Lětsa zaběraja so čłonojo dźěłoweje skupiny z wužiwanjom mjeńšinoweje rěče w zjawnosći respektiwnje zjawnych institucijach.

Z 10 milionow rěčacymi katalančami słuša tuta rěč k wjetšim mjeńšinowym rěčam. Katalanšćina je w někotrych kónčinach Španiskeje jako regionalna hamtska rěč připóznata, z tym je w měsće Tarragone mjeńšina prezentna. Njezadźiwa tuž, zo su znački na dróhach w tutej regionje w katalanšćinje abo hdyž-li dwurěčne, potom je katalanšćina prěnja wužiwana rěč.

Hačrunjež je to dosć wulka ličba katalansce rěčacych, so zastupjerjo wo přichod starosća. Sobudźěłaćerka katalanskeje šule za zjawne zarjadnistwo Mireia Plana wuwjedźe w jeje přednošku, zo je ličba wužiwarjow katalanšćiny wot 2003 z 46% na 36% w lěće 2018 pomjeńšiła. W španiskim nadregionalnym zjawnym zarjadnistwje, tak Plana, njeje winowatosć, katalanšćinu wužiwać. Katalančenjo pak so dale wo připóznaće rěče prócuja. 

Na dalšim programje dźěłoweje skupiny steji dźensa hišće wužiwanje mjeńšinoweje rěče w nowych technologijach a socialnych medijach. Tak su Katalančenjo na přikład docpěli, zo stej platformje Twitter a Facebook w katalanšćinje wužiwajmne. Serbow zastupuje sobudźěłaćerka Domowiny, Božena Šimanec.