Přihoty přichodneho posedźenja Zwjazkoweho předsydstwa stejachu w srjedźišću posedźenja prezidija Domowiny dnja 06.03.2019 we Wojerecach.Čłonojo prezidija Domowiny zaběrachu so mjez druhim z naćiskomaj dźěłowych ćežišćow zarjada Domowiny a Rěčneho centruma WITAJ za lěto 2019, pomjenowanjom štyrjoch zastupjerjow Serbow do jury za idejowe wubědźowanje Sakskeje k spěchowanju strukturneje změny, kaž tež z pomjenowanjom čłonow wólbneho wuběrka za wólby Rady za naležnosće Serbow při Braniborskim krajnym sejmje. Wo předłohach rozsudźić ma Zwjazkowe předsydstwo na swojim přichodny posedźenju.Tež zaběrachu so z předstejacymi wólbami prezidija FUEN – Federalistiskeje unije europskich narodow, třěšneho zwjazka, kotremuž tež Domowina přisłuša. Tute přewjedu so na přichodnym kongresu srjedź junija tutoho lěta w Bratislavje.Prezidij Domowiny namołwja zwólniwych Serbowkow a Serbow, hač jednotliwc, čłon/-ka župy abo serbskeho towarstwa, so přizjewić, wobsteji-li zwólniwosć, so na europskej runinje čestnohamtscy za zajimy Serbow a Domowiny zasadźeć. Nimo prezidija FUEN skići tež dialogny forum, kotryž dźěławosć prezidija FUEN podpěra, móžnosć, so politisce angažować. Namjety a požadanja přiwza sekretariat Domowiny. Hač do 23.03.2019 ma Domowina móžnosć, podać namjety za wólby prezidenta, čłonow prezidija a europskeho dialogneho foruma FUEN.Přichodne posedźenje Zwjazkoweho předsydstwa Domowiny wotměwa so 15.03.2019 w Chrósćicach. Přichodne posedźenje prezidija Domowiny wotměwa so 29.03.2019 we Wojerecach.Hłowna zhromadźizna Domowiny wotměła so 30.03.2019 tohorunja w Chrósćicach.