Budyšin, dnja 27. meje 2024 – Na přeprošenje Domowiny wopyta intendant MDR Ralf Ludwig póndźelu nawječor Serbski dom w Budyšinje. Dawid Statnik, předsyda Domowiny, Bjarnat Cyž, čłon rozhłosoweje rady MDR, Judit Šołćina, jednaćelka Domowiny, Sandro Viroli, direktor MDR Sakskeje w Drježdźanach a Bogna Korjeńkowa, nawodnica studija MDR w Budyšinje, so na rozmołwje wobdźělichu.

Běše to prěni raz, zo wopyta loni wuzwoleny intendant MDR Serbow. W Budyskim studiju poby w redakciji serbskeho młodźinskeho wusyłanja Radijo Satkula, zo by k 25. jubilejej gratulował.

Dawid Statnik wuzběhny wuznam MDR jako wšědny rěčny rum za Serbow. "MDR spjelnja wažnu rólu při zdźerženju našeje rěče a kultury a při tym, ju do moderneje medijoweje krajiny zapřijeć", tak Statnik. "Dźakujemy so MDR za wšě dotalne wukony – nic jenož w rozhłosu, runje tak w telewiziji a w digitalnym wobłuku. Zdobom wočakujemy, zo MDR w tutym swojim prócowanju njepopušći. "

Judit Šołćina doda: "Prezenca serbšćiny a serbskeje kultury w medijach je přewšo wažna, zo by naša rěč była widźomna a słyšomna. Jenož tak móže dale wobstać. MDR je w minjenych lětach jara tomu přinošował a wjele zmóžnił. Nadźijamy so, zo nas tež w přichodźe dale podpěruje. "

Hladajo na dalše wuwiće serbskeho rozhłosa Statnik wuzběhny, zo MDR při tym rozsudnu rólu hraje. "Hospodarić a lutować postajejtej wužiwanje srědkow. Při tym ma so stajnje wokedźbować, zo ma serbski rozhłós wosebity wuznam za komunikaciju a zjawne měnjenje w serbskim ludźe “, wuzběhny předsyda Domowiny a wabješe za to, tole při trěbnym wurunanju etata MDR hladajo na serbske poskitki wobkedźbować.

„Diskusije wo tym, hač so rozhłosowy přinošk wot 2025 hižo njezwyša, potrjebje wotpowědowacym financowanju zjawnoprawniskeho rozhłosa njepolěkuja. Tute pak je njewotwisna komisije w zakonsce rjadowanym jednanju doporučiła“, warnowaše Statnik. Přez to je nimo cyłkowneho zjawneho nadawka MDR tež serbski poskitk sćelaka wohroženy.  „Wšitcy zamołwići měli so za to zasadźić, zo so serbski program bjez skrótšenjow zaruči.“

Ralf Ludwig hódnoćeše angažement a zahoritosć serbskich zastupjerjow. "MDR je hordy na to, mnohostronski a na kulturje bohaty serbski publikum w swojej maćeršćinje medialnje podpěrać. Budźemy so dale wo to prócować, zo wostanjetej serbska rěč a kultura w našich programach prezentnej ", tak Ludwig. Při wopyće redakcije radija Satkule w studiju MDR w Budyšinje gratulowaše wón młodym rozhłosownikam k 25. jubilejej.

Bjarnat Cyž, wuzwoleny zastupjer Serbow w rozhłosowej radźe MDR, wuzběhny sylnu medialnu prezencu: "Nadměru wažne wostanje, zo je hłós Serbow w MDR słyšeć. Mamy zaručić, zo so tež w přichodźe serbske naležnosće wobkedźbuja. Financowanje wotpowědneje potrjeby MDR maja naši politikarjo w knježerstwach a parlamentach zawěsćić.“

Sandro Viroli a Bogna Korjeńkowa podšmórnyštaj dobre styki a wuske zhromadne dźěło mjez MDR a Serbami. "Naše zhromadne dźěło je najlěpši přikład za to, zo zamóža zjawne medije ze swojimi tež do regionow wusměrjenymi poskitkami k zdźerženju a spěchowanju mjeńšinowych rěčow a kulturow přinošować", praji Viroli.

Zastupjerjo Domowiny wjesela so na dalše płódne zhromadne dźěło. Dale nadźijeja so, w MDR měć stajnje zwjazkarjow za naležnosće a potrjeby Serbow.