Pod nawodom předsydy Domowiny Dawida Statnika wuradźowaše Zwjazkowe předsydstwo Domowiny pjatk wječor, 29. nowembra, w Budyšinje.Jedna tema bě diskusija wustawkow Domowiny, štož bě 19. hłowna zhromadźizna lětsa kónc měrca wobzamknyła. Jednaćel Domowiny Marko Kowar informowaše přitomnych wo aspektach, kiž maja so po měnjenju prawniskeho wuběrka při aktualizowanju wustawkow wobkedźbować. To nastupa na přikład čłonstwo přirodnych wosobow a kak so tute w strukturje třěšneho zwjazka organizatorisce zarjaduja, noworjadowanje k juristiskemu zastupowanju woprawnjeneho předsydstwa, aktualizowanje nadawkow zwjazkoweho předsydstwa, předsydy a městopředsydow kaž tež škit datow. Čłonojo zwjazkoweho předsydstwa, župy a towarstwa móža hač do 31. decembra 2019 swoje namjety a pokiwy k dalšim wobsaham, kiž maja so w nowym naćisku wobkedźbować, pisomnje a z krótkim wopodstatnjenjom Domowinje zapodać. Klětu w februarje chce so zwjazkowe předsydstwo znowa z wustawkami zaběrać a po tym naćisk do šěrokeje diskusije dać.W prěnim dźělu swojeho posedźenja wobjedna zwjazkowe předsydstwo rozprawje zarjada Domowiny a Rěčneho centruma WITAJ (RCW) wo swojej lońšej dźěławosći. Zwjazkowe předsydstwo wupraji wšěm přistajenym wutrobny dźak za jich dźěło. Wjednica RCW dr. Beata Brězanowa předstaji na zakładźe wubranych dypkow dźěłowych směrnicow Domowiny dotalne spjelnjenje tutych dypkow a plan RCW za 2020. Pedagoga w Choćebuskej wotnožce rěčneho centruma Aleksander Draguła rysowaše nowe akcenty rěčno-pedagogiskeho dźěła w Delnjej Łužicy, po tym zo bě loni dźěło zahajił. Po diskusiji wobzamkny zwjazkowe předsydstwo dźěłowe ćežišća zarjada, plan dźěławosće RCW kaž tež hospodarski plan za lěto 2020. Dale schwali wone terminy posedźenjow a hłowne wobsahi zwjazkoweho předsydstwa a jeho prezidija hač do přichodneje hłowneje zhromadźizny w měrcu 2021.W lěće 2021 zhladuja župy “Jan Arnošt Smoler” Budyšin, “Michał Hórnik” Kamjenc a “Handrij Zejler” Wojerecy na 100. róčnicu swojeho załoženja. Zwjazkowe předsydstwo schwali zestawu přihotowanskeho wuběrka, kiž ma pod nawodom předsydy Domowiny Dawida Statnika přihoty a přewjedźenje jubilejneho lěta koordinować.Klětu wotměje so w ruskim měsće Ufa Folkloriada, wot CIOFF® organizowany swětowy folklorny festiwal, kotryž so kóžde 4 lěta přewjedźe. Serbska rejowanska skupina Smjerdźaca bu wot předsydstwa CIOFF-Němska za wobdźělenje na Folkloriadźe nominowana. Domowina podpěra tute delegowanje. Wysokich kóštow dla prosy zwjazkowe předsydstwo direktora Załožby za serbski lud wo podpěru rejowanskeje skupiny při namakanju spěchowanskich móžnosćow přez němske knježerstwo, a to zhromadnje z kulturnym referentom Domowiny. Dalša tema bě změna w zestawje zwjazkoweho předsydstwa, dokelž staj dotalnej zastupjerjej župy “Handrij Zejler” swoje čłonstwo w gremiju złožiłoj: Enrico Šołta z priwatnych a powołanskich přičin a Marcel Brauman, dokelž zahaji spočatk noweho lěta swoje dźěło w zarjedźe Domowiny a tohodla swój mandat wjace wukonjeć njemóže. Zwjazkowe předsydstwo slědowaše próstwje župy a wobzamkny na namjet předsydy Domowiny, zo smětaj so Lubina Dučmanowa a Mila Libšowa jako zastupjerce župy hač k nowowólbam jako stajnej hosćej na posedźenjach zwjazkoweho předsydstwa wobdźěleć. Čłon zwjazkoweho předsydstwa Maximilian Hasacki poda krótku rozprawu wo UNESCO-konferency za indigene rěče, kotraž wotmě so w juniju w Kanadźe a na kotrejž je so wobdźělił. Čłonojo zwjazkoweho předsydstwa slědowachu jeho słowam z wulkim zajimom a namjetowachu, zo by wo tym přinošk do Noweho Casnika napisał, zo by so namjet dale w zjawnosći diskutował.