Póndźelu wječor, 2. meje, woswjeći Sakski kontaktny běrow we Wrócławju swoje 10-lětne wobstaće. Tež zastupjerjo Serbow so na tym wobdźělichu, kaž Christina Boguszowa, direktorka Serbskeho muzeja w Budyšinje, Judith Šołćina, jednaćelka Domowiny, kotraž sposrědkowa nawodej kontaktneho běrowa zbožopřeća Domowiny, a Clemens Škoda, referent Domowiny za kulturu a wukraj.

Po puću do Wrćcławja zetkataj so Šołćina a Škoda w Legnicy z wjednicu kulturneho wotrjada Wojewódstwa Lubuskie, direktorom Legnickeho kulturneho zarjada a předsydu łemkowskeho towarstwa Kyczera. Srjedźišćo dźěłoweje rozmołwy běše zhromadny europski projekt, při kotrymž móhła Domowina z partnerom być.

Do jubilejneho koncerta sakskeho kontaktneho běrowa zetkataj so Šołćina a Škoda ze zastupjerjemi „Towarzystwa Serbołužyckie we Wrócławju”, asociěrowane towarstwo Domowiny. Ludmiła Gajczewska a Piotr Gaglik rozprawještaj wo ćežkej situaciji towarstwa, kotrež njeje pandemije dla dźěławosć w tej měrje zaručić móhło. Piotr Gaglik: „Bychmy so wjeselili, jeli bychmy nětko zaso wjac serbskich delegacijow a skupinow we Wrócławju witać a sej sami zaso raz do Łužicy dojěć móhli. Organizujemy na přikład wodźenje po Wrócławju ze serbskeho wida.”

zetkanje Judit Šołćineje a Clemensa Škody (2. a 1. w.p.) ze zastupjerjomaj asociěrowaneho towarstwa Domowiny we Wrócławju, Ludmiłu Gajczewskej a Piotrom Gaglikom

foto: Clemens Škoda