Na swojim dźensnišim kónclětnym posedźenju je so prezidij Domowiny mjez druhim z financami zaběrał. Za lěto 2024 su župy, Domowinske skupiny a towarstwa wšě w hospodarskim planje zaplanowane srědki, dohromady 65.000 €, wučerpali. To su 25.000 € za župne projekty k spěchowanju serbskeje rěče a kultury a 40.000 € za Domowinske skupiny a towarstwa.

Za klětu su župy samo telko projektow a idejow zapodali, zo so cyłkowna suma překroči. Prezidij je dźensa rozsudźił, sumu tuchwilu wobmjezować a wuwiće w prěnich kwartalach 2025 wobkedźbować.

Tež přihot hłowneje zhromadźizny třěšneho zwjazka steješe na planje. Prezidij je so dźensa z jednanskim porjadom zaběrał, kotryž ma zwjazkowe předsydstwo hišće wobjednawać. Prašenja tam běchu na přikład, kak dołhe měli diskusijne přinoški być, abo štó budźe moderaciju přewzać. Dalše prašenje bě ličba mandatow čłonskich cyłkow na hłownej zhromadźiznje. Čłonki a čłonojo su namołwjeni, hač do 31.01.2025 namjety za wobzamknjenja na hłownej zhromadźiznje zapodać.

Dale je prezidij Domowiny referentku za naležnosće kubłanja a spěchowanje dorosta Katrin Suchec-Dźisławkowu jako zastupjerku Serbow do rozšěrjeneje rady studijneje akademije w Budyšinje powołał (na dobu 2025 – 2028).

Pozadk: Wot 1. januara 2025 přeměni so powołanska akademija Sakska na Dualnu wysoku šulu Sakska. Tuta reforma je dźěl noweho Sakskeho zakonja wo wysokich šulach. Na Dualnej wysokej šuli budźe mj. dr. pod wěstymi wuměnjenjemi studij bjez abitury móžny. W rozšěrjenej radźe studijneje akademije Budyšin je w nowym zakonju tež zastupjerstwo Serbow z jednej wosobu zapisane, kotruž ma po Serbskim zakonju třěšny zwjazk powołać.

Dale je prezidij Dianu Šołćinu jako zastupjerku Serbow a Bena Hojerja jako jeje zastupjerja do Krajneje kubłanskeje rady Sakskeje na dobu wot 01.03.2025 hač do 28.02.2027 powołał. Rozsud je Domowina we wothłosowanju ze Serbskim šulskim towarstwom z. t. tworiła.

Pozadk: Krajna kubłanska rada Sakska poradźuje Sakske statne ministerstwo za kultus při naležnosćach wuhotowanja kubłanja. W radźe su wšelake towaršnostne skupiny zastupjene, kaž wučerjo, starši, šulerjo abo wědomostnicy. Zaměr je, šěroko wothłosowanu a do přichoda wusměrjenu kubłansku politiku zaručić.

Zhromadny rezimej prezidija

Prezidij je so lětsa jědnaće razow na wšelakich městnach we Łužicy wuradźował. Čłonka a čłonojo zhladuja na dobre, intensiwne lěto 2024 wróćo. “Smy intensiwnje dźěłali, smy wjele docpěli a naš wjeršk lětsa běše přijeće Domowiny w Lubinje.”, tak zhromadny o-zwuk. Prezidij je měnjenja, zo móhł so wuspěšny format wospjetować. Běše to dobra přiležnosć za wuměnu a rozmołwu. Dźak wupraja prezidij wšěm čestnohamtskim čłonkam a čłonam, kaž tež hłownohamtskim sobudźěłaćerkam a sobudźěłaćerjam za zaměrne a wuspěšne skutkowanje na dobro serbskeho ludu. Zhladujo do přichoda namołwja prezidij kandidować za nowe zwjazkowe předsydstwo, kotrež woli so na hłownej zhromadźiznje 05.04.2025.