Serbja wobdźěla so přez Domowinu (kotraž je čłonka Federalistiskeje unije europskich narodnych mjeńšin-FUEN) na lětušej Europeadźe – tónraz zaso z dwěmaj koparskimaj mustwomaj (žony/mužojo). Europski koparski turněr mjeńšinow budźe w Němskej a Danskej wot soboty 29.06.2024 do njedźele 07.07.2024.

Hosćićeljo tutoho wjerška su Sinti a Roma w Schleswigsko-Holsteinskej, Frizojo, němska mjeńšina w Danskej kaž tež danska mjeńšina w Němskej. Dohromady 35 teamow wobdźěli so na turněrje, kotryž so w 14 wšelakich stadionach wotměje. Organizator Europeady je FUEN zhromadnje z lokalnymi zarjadowarjemi. Nimo koparskich wubědźowanjow je wobšěrny ramikowy program planowany.

Europeada njerěka “jenož za bulom honić a dobyć”. W srjedźišću steja hódnoty toleranca, wšelakorosć a respekt. Fokus Europeady leži na zesylnjenju widźomnosće mjeńšinow a mjeńšinowych skupinow ale tež na skrućenju swójskeje identity. Podajmy so tuž na zhromadny puć pod hesłom “zhromadnje smy jónkrótni”.

“Za nas je Europeada wulkotna móžnosć zahoritosć za našu kulturu a rěč prowokować a zdobom zwjazanosć mjez Hornjej a Delnjej Łužicu hajić. Přeju sej jara, zo docpějemy finalne koła. Nadźijam so nimo toho dobreje nalady mjez fanami tam ale tež we Łužicy. A dale přeju sej, zo přinošuje projekt dalšej widźomnosći našeje rěče a kultury w zjawnosći.”, tak nawoda serbskeje delegacije Clemens Škoda.

Přihoty mustwow přewzaja čestnohamtscy trenarjo a nawodźa mustwow z Delnjeje a Hornjeje Łužicy.

Zestawa mustwow

Serbske mustwo žonow

Pětr Bejmak – trenar, Handrij Rachela – kotrenar, Jadwiga Rychtarjowa – nawodnica mustwa

Serbske mustwo mužow

Sven Ballack a Frank Ričel (trenarjej), Frank-Norbert Sieg a Bjarnat Deleńk (nawodaj mustwa)

Terminy / medije

Štóž sej hišće njeje wěsty, hač móže so na puć z našimi sportowcami podać, ma składnosć, sej testowu hru wobhladać. Žony hraja 18.05. w 11:00 hodź. w Ralbicach a mužojo 23.05. we 18:00 hodź w Janšojcach. Po woběmaj hromaj skići so za medije a zjawnosć předstajenje nominowaneho kadra za Europeadu. Prašenja wotmołwja potom nawodźa mustwow a delegacije.

Mužojo hraja swoju
prěnju hru turněra 30.06. w 11:00 hodź. w Tönning.
Dalšej hrě budźetej 01.07. w 17:30 hodź. w Niebüll
a 02.07. w 17:30 hodź. w Bredstedt.

Žony hraja
30.06. w 14:00 hodź. w Flensburg Stjernen a
01.07. w 15:00 hodź. w Harrislee.

Livestream

Wšitke informacije Serbskeho mustwa a link na livestream Europeady su w přichodźe na webstronje www.europeada.domowina.de (so hišće twari) wozjewjene.

Informacije zarjadowarja namakaće: www.europeada.eu

Naše social-media-kanale

https://www.instagram.com/serbskemustwo/

https://www.facebook.com/serbskemustwo/

Wjeselimy so tež, jeli pokazaće přez hashtag #serbskemustwo na naš team žonow a mužow.

Wabjenski material

Fanojo móža sej w Serbskej kulturnej informaciji w Budyšinje trěbny ekwipment wobstarać. T-Shirty dóstanjeće přez wobchod Trikotfreunde: https://trikotfreunde-shop.de/Serbske-Mustwo/