Přeprošamy zajimčow a zajimcow na přichodne posedźenje Zwjazkoweho předsydstwa Domowiny, kotrež budźe pjatk, 17.11.2023 w 18.00 hodź. na žurli Kulturneje fabriki we Wojerecach.

Na dnjowym porjedźe steja wšelake informacije, wothłosowanja, ale tež zhromadne dźěło w diskusijnym kole. Tak budźe županka Gabriela Linakowa wo aktualnej situaciji Wojerowskeje župy “Handrij Zejler” rozprawjeć a steji za prašenja k dispoziciji.

Lěto 2023 so pomału ke kóncej chila a Domowina zaběra so hižo z klětušimi terminami. Tuž chcemy plan posedźenjow zwjazkoweho předsydstwa a prezidija 2024 schwalić.

Dale steji diskusijne koło na agendźe. W minjenych měsacach je so wuběrk za naležnosće změny strukturow, hospodarstwo a infrastrukturu ze spožčenjom noweho myta za hospodarstwo zaběrał. Zhromadnje z přitomnymi čłonkami a čłonami zwjazkoweho předsydstwa chcemy wobsahi při temowych blidach diskutować a namjet dale wufilować.  

Štóž njemóže so na posedźenju we Wojerecach wobdźělić, móže tutomu tež na našim YouTube-kanalu resp. na startowej stronje Domowiny sćěhować. Naprašowanja k serbskim naležnosćam móžeće hač do 16.11., zapodać na sekretariat@domowina.de. 

Dnjowy porjad (serbsce a němsce) je na internetnej stronje Domowiny přistupny. Předłohi zjawneho dźěla posedźenja su tohorunja online.