Ku góźbje “lěta župow”, kenž buźo w lěśe 2021, co Domowina wuměnu mjazy kupkami a towaristwami Dolneje, srjejźneje a Górneje Łužycy pódłymiś: Na corajšnem (srjodu) zmakanju prezidija a zastupnikow župy Dolna Łužyca w Chóśebuzu su wóni tuchylne pśigótowanja na Europeadu ako jaden z dobrych pśikładow wugódnośili. Druga wažna tema w diskusiji, na kótarejž jo se teke pśedsedaŕka Bramborskeje Serbskeje rady Kathrin Šwjelina wobźěliła, jo było pśesajźenje praktiskich konkluzijow a dopórucenjow z ewaluacije serbskeje wucby. How buźo w měrcu pśiduce rozgrono z Bramborskeju kubłańskeju ministaŕku, Brittu Ernstoweju.Južo něnto su zarědowanja ako stacija Folklornego festiwala w Hochozy pótajmny tip mjazy familijami z Górneje Łužyce. Na drugem boku wubuźiju woglědy do Chrosćic abo na Schadźowanku w Budyšynje pla dolnołužyskich źiśi a młodostnych pśecej jaden wěsty “aha-efekt”, gaž dožywiju tam serbšćinu ako rěc wšednego dnja. Pśedsedaŕ Domowiny, Dawid Statnik, ma teke wěcej wuměnow mjazy łužyskimi šulami za zmysłapołne, “za rědne a zajmne dožywjenja njemusyš se pśecej do dalokego wukraja pódaś, ale teke we regionach našeje Łužyce mógu wukniki wjele nowych zajmnostkow wótekšywaś.”