Měsačne wuradźowanje regionalnych rěčnicow a referentow Domowiny je so srjedu pod nawodom Sonje Hrjehorjoweje serbskemu filmej wěnowało. Jednaćel Domowiny, Marko Kowar, móžeše zastupowacu direktorku Załožby za serbski lud, Michaelu Mošowu, witać, kiž referowaše wo dołholětnej podpěrje załožby za nastawanje filmow wosebje za dźěći a młodostnych. Přezjedni su sej wobdźělnicy diskusije ze zastupjerku załožby byli, zo dyrbja w srjedźišću „filmy w serbskej rěči” stać, nic jenož wo serbskej tematice.

Projektowy manager za Dolnu Łužycu, Frank Kosyk, skedźbnješe na dobre nazhonjenja z dolnoserbskimi krótkofilmami, za kotrež je jim SAEK Budyšin jendźelske podtitule zhotowił. Samo projekt wulkeho serbskeho hrajneho filma po informacijach Michaele Mošoweje dale pokročuje, tule je załožba akteram bóle ideelnje poboku, wšako kóšty tajkeho předewzaća móžnosće załožby přesahuja. Předsyda Domowiny, Dawid Statnik, poruča wjac synchronizacije mjezynarodnych filmow, kaž je to druhim ludam kaž na přikład Danam tež ze samozrozumliwosću.

Wosebje w Dolnej Łužycy je so w zwisku z Chóśebuskim filmowym festiwalom wjele na polu filmow ze serbskej tematiku hibało. Tola rosćaca syć angažowanych filmowcow, tak praješe Michaela Mošowa, je mjeztym po cyłej Łužicy samo hač do Zhorjelca zastupjena.   

Kóždy měsac steji jedyn region wosebje w fokusu tutoho wuradźowanja, tón raz Dolna Łužyca. Zastupowacy jednaćel Domowiny, Marcus Końcaŕ, informowaše wo njedawnej hłownej a wólbnej zhromadźiznje župy a zwjeselacym rozrosće čłonstwa třěšneho zwjazka Serbow w Dolnej Łužycy: Tuchwilu je jich 2.580 čłonow, to rěka 660 wjac hač před dźesać lětami. So wě, zo su na digitalnym wuradźowanju regionow srjedu tež přihoty na hłownu zhromadźiznu 12. smažnika/junija w Slepom rozjimali. Nimo zwučenych organizatoriskich prašenjow sej tón raz koncept hygijeny pandemije dla wjele kedźbnosće žada.