Europska komisija njeje zwólniwa, nowe zakonje wo škiće narodnych mjeńšin na zakładźe žadanjow iniciatiwy Minority SafePack (MSPI) namjetować. K tomu so předsyda Domowiny, Dawid Statnik, wupraja:„Jako Serbja smy přeswědčeni Europjenjo, kotřiž wosebje tak mjenowanu politiku kohezije witaja, kiž runoprawne wuwiće regionow a teritorialnych socialnych cyłkow spěchuje. Tohodla smy zludani, zo to po měnjenju Europskeje komisije za narodne mjeńšiny wočiwidnje njepłaći. Dźakuju so wšitkim, kotřiž su iniciatiwu dotal podpěrali a ju dale podpěraja. Tež hdyž njeje so dotal radźiło, komisiju přeswědčić, zo je to wažna naležnosć, chcemy za to dale wojować. Přizamknu so reakciji Hartmuta Koschyka, něhdyšeho społnomócnjeneho Němskeje za wusydlencow a narodne mjeńšiny. Tež Domowina wočakuje nětko wotmołwu zwjazkoweho knježerstwa na tón afront přećiwo europskej wobydlerskej iniciatiwje, wšako je zwjazkowy sejm MSPI jednohłósnje podpěrał.”