Prezidij Domowiny wobkrući poskitk iniciatiwje „Serbski sejm”, třěšnemu zwjazkej přistupić. Wotpowědny poskitk zastupjerjow Domowiny póndźelu na zetkanju w Budyskim Serbskim domje je inicitiatiwa dźensa w zdźělence wotpokazała, dokelž „njeje towarstwo”. K tomu so předsyda Domowiny, Dawid Statnik, wupraja:„Běše konsens mjez zastupjerjemi Domowiny a iniciatiwy ,Serbski sejm’, zo chcemy přichodnje z jednym hłosom na dobro serbskeho ludu wustupować a tohodla dale ze sobu rěčeć. Serbska ciwilna towaršnosć je w swojej cyłej wšelakorosći dwěsćě serbskich cyłkow – a to njejsu jeničce towarstwa – w třěšnym zwjazku organizowana. Poskićamy tohodla dale inciatiwje ,Serbski sejm’, jako cyłk Domowinje přistupić a so ze wšěmi druhimi serbskimi cyłkami do diskusije wo najspomóžnišim přichodnym modelu zastupnistwa zajimow serbskeho ludu podać. So wě, zo móže kóžda skupina, kotraž Domowinje přisłuša, dale samostatnje dźěłać, wšako smy bazodemokratiska narodna organizacija.  W tutym ramiku ma tež tuta iniciatiwa wšě prawa a šansy, argumentować a přeswědčić. Hinašeho puća njeje, jeli nochcemy jednotu serbskeho ludu na hrački stajić, dokelž tajke pačenje bě Serbam w stawiznach přeco na škodu.” Link k zdźělence wo zetkanju z iniciatiwu póndźelu: https://www.domowina.de/hsb/medijowy-wobluk/blog/c1c245df7e4534025f7d741dfc5b0e30/?tx_news_pi1%5Bnews%5D=1501&tx_news_pi1%5Bcontroller%5D=News&tx_news_pi1%5Baction%5D=detailDale je so prezidij dźensa ze zastupjerjemi župy „Jan Arnošt Smoler” Budyšin zetkał, w srjedźišću rozmołwy stejachu aktualne kubłanskopolitiske naležnosće. Na dnjowym porjedźe rjadneho posedźenja wěnowachu so čłonojo prezidija mjez druhim klětušej hłownej zhromadźiznje dnja 27.3.2021 – doskónčny rozsud wo konkretnej formje pod wuměnjenjemi pandemije budźe hakle w nowembrje. Zdobom je prezidij naćisk dźěłowych směrnicow 2021-2023 a změny wustawkow za dalše wobjednanje w zwjazkowym předsydstwje wobzamknył.