Serbske mustwo žonow poda so přez kónc tydźenja do Werdaua, zo by treningowe lěhwo jako přihot lětušeje europeady přewjedło. Dohromady 19 holcow a žonow so na přihotowanskim kóncu tydźenju wobdźěli. Pjatk wječor přewjedźe so prěnja treningowa jednotka z wšelakorymi techniskimi zwučowanjemi za hrajerki a specielnymi zwučowanjemi za wrotarki. Zakónčaca hra skulojći zazběh sep jednotliwych treningowych jednotkow. Po wječeri slědowaše oficialne wotewrjenje treningoweho kónca tydźenja přez trenarja Pětra Bejmaka. Nimo toho wuhódnoći so wurězk nahrawaneje widejoweje sekwency zakónčaceje hry.

Rańši sport, lochke joggowanje, do snědanje steješe sobotu rano na planje. Po zhromadnej snědani slědowaše za wšitke hrajerki teoretiski dźěl. Tam dóstachu wone mjez druhim taktiske zapokazanje. Po teoretiskim dźělu slědowaše praksa na kumštnym trawniku. Hrajerki přewjedźechu wšelakore techniske a taktiske zwučowanja. Wrotarki dóstachu separatnu treningowu jednotku. Po wobjedźe a přestawce přewjedźe serbske mustwo žonow přećelsku hru na muži z Borna, kotřiž přebywachu tohorunja w sportowej šuli Werdau. Hra słužeše k tomu, zo bychu so wšelakore konstelacije kaž tež warianty wuspytali a zo by mustwo raz jako cyłk hromadźe hrało. Hrajachu so tři połčasy, kotrež běchu stajnje poł hodźiny dołhe. Hra je so nahrawała, zo bychu so wubrane sekwency wuhódnoćić móhli. Po wječeri slědowaše zhromadny mustwowy wječor, hdźež so wšelakore lóštne hry za zeznaće hrajachu.

Tež njedźelu rano přewjedźechu hrajerki do snědanje lochki běh přez Werdau. Po snědani slědowaše znowa teoretiski dźěl, hdźež so mjez druhim jednotliwe sekwency nahrawaneje hry wuhódnoćichu. Sćěhowaše trening na kumštnym trawniku. Wrotarki zwučowachu znowa zhromadnje a hrajerki wukmanichu so dale z bulom. Na kóncu poslednjeho treninga hraješe so hišće zhromadna hra. Kóžda treningowa jednotka zakónči so z přewjedźenjom regeneraciskich zwučowanjow. Po wobjedźe poda so serbske mustwo žonow zaso na dompuć.

Wulki dźak słuša organizatoram a wuhotowarjam za přewjedźenje treningoweho lěhwa. Dalši dźak słuša Šustrec elektrofirmje, kotraž je dwaj transporteraj krótkodobnje k dispoziciji stajiła.

Awtorka: Tereza Wićazowa