Wólbne forumy Domowiny w Sakskej su so wuspěšnje přewjedli. W třoch zarjadowanjach we wšelakich wólbnych wokrjesach stajachmy kandidatkam a kandidatam stronow CDU, SPD, Zelenych, Lěwicy, AfD, Swobodnych wolerjow a BSW prašenja k serbskim temam, kiž wusměrichu so wosebje na serbske kubłanje a medije. Wulkich diskusijow mjez kandidatami drje njebě, ale Domowina je zastupjerkam a zastupjerjam palace temy Serbow sobu na puć dała. Tež wothłós Serbow bě přewšo dobry. Mjez 25 a 50 zajimcow wobdźěli so na zarjadowanjach. Temy forumow Domowiny serbski lud tuž jara zajimowachu.

Wot dźensnišeho su tež wólbne kopolaki za Saksku na našej webstronje wozjewjene, kotrež tworjachu zakład wólbnych forumow. Wotmołwili na prašenja Domowiny – kotraž je tute do toho zjawnje w ludnosći zběrała – su Swobodni wolerjo, BSW, AfD, Lěwica, Zeleni, CDU a SPD.

Kak pak steja politiske strony scyła k Serbam? Kelko serbskich temow jewja so w jich politiskich programach za lětuše Sakske wólby? Čitajće wjace wo tym w zjimanju pasažow k Serbam politiskich stron we Sakskej, kotrež smy za was zestajili.

Wótegrona na naše wólbne kopolaki za Bramborsku tuchylu pśigótujomy a w pśiducych dnjach wózjawijomy. Wótegronili su w Bramborskej strony Lěwica, SPD, Zelene, FDP, CDU, Lichotne wólarje a BSW.

Foto (Domowina / Božena Šimanec): Přez Domowinski wólbny forum za wólbny wokrjes Budyšin 56, kotryž wotmě so w hosćencu “Wódny muž” w Malešecach, wodźeše moderator Jakub Wowčer (nalěwo). W podiju wobdźělichu so na diskusiji sćěhowacy direktni kandidaća: Marko Šiman (CDU), Andrea Kubank (Lěwica), Peter Temme (zwjazk Sarah Wagenknecht), Christian Schäfer (Zeleni), Mike Hauschild (Swobodni wolerjo), Jörg Urban (AfD), Alexander Ahrens (SPD) - (wotlěwa). Tež na tutym wólbnym forumje bě publikum prašany. Při tym hraješe tež konkretny wólbny wokrjes Budyšin 56 rólu. Na prašenje štó z přitomnych bě njedawno na lokalnym wjesnym swjedźenju w Hućinje, wotmołwi přewažny dźěl z “ně”.