Domowina přeprošuje hižo nětko wšitke čłonki a wšitkich čłonow na klětušu hłownu a wólbnu zhromadźiznu, kotraž budźe

5. haperleje 2025 w Serbskim ludowym ansamblu w Budyšinje.

Na tutym wažnym zarjadowanju chcemy zhromadnje z delegatkami a delegatami čłonskich župow a towarstwow dalšu dźěławosć našeho třěšneho zwjazka planować.

Čłonki a čłonojo přisłušnych župow a towarstwow su za dźěławosć Domowiny njeparujomni partnerojo. Tohodla je wažne, zo so delegaća towarstwow na zhromadźiznje wobdźěla. Zhromadnje chcemy wo zakładnych prašenjach diskutować, sej dalše zaměry za přichodne dźěło stajić a wo tym rozmyslować, kak móžemy naše hódnoty dale wuwiwać: zamołwitosć, wotewrjenosć a zwjazanosć.

Hłowna zhromadźizna ma mjez druhim nadawk, nowy program Domowiny schwalić. Aktualna wersija je na našej webstronje wozjewjena.

Dźěłowe směrnicy 2025 – 2027:
Prosymy wo Waše namjety!

Dalše ćežišćo zhromadźizny budźe rozsud wo dźěłowych směrnicach za dobu 2025 – 2027. Tute postajeja konkretne nadawki a zaměry, kotrež maja so w přichodnymaj lětomaj zwoprawdźić. Přeprošamy tež zjawnosć, namjety za dźěłowe směrnicy zapodać. Tute dyrbja konkretne, realizujomne a wotličomne być. Zakład za namjety je hižo mjenowany naćisk programa Domowiny.

Waše namjety za dźěłowe směrnicy móžeće hač do 30. nowembra 2024 z mejlku na sekretariat@domowina.de zapodać.

Wužiwajće tutu składnosć, z kotrejž móžeće dalšu dźěławosć třěšneho zwjazka aktiwnje sobu wuhotować.   

Pytamy kandidatowza zwjazkowe předsydstwo

W přihotach na hłownu zhromadźiznu pytamy tež kandidatki a kandidatow za wólby do Zwjazkoweho předsydstwa Domowiny. Je to centralny gremij Domowiny, kotryž zwoprawdźenje dźěłowych směrnicow a dźěławosć zarjada dohladuje. Posedźenja wotměwaja so štyri do šěsć razow wob lěto po cyłej Łužicy.

Tuž přeprošujemy a namołwjamy Was, čłonki a čłonow Domowiny, za gremij kandidować. Trjebamy angažowanych ludźi, kiž chcedźa w zwjazkowym předsydstwje zhromadnje wo wažnych prašenjach a wužadanjach našeho ludu rozsudźeć.