Prezidij Domowiny je so na swojim dźensnišim posedźenju w Budyskim Serbskim domje z předłohami za hłownu zhromadźiznu zaběrał. Tak běchu mj. dr. dźěłowe směrnicy Domowiny tema. Tute su konkretne nadawki, kotrež su na zaměry programa Domowiny wusměrjene. Naćisk směrnicow je na webstronje Domowiny wozjewjeny. Tež zjawnosć je přeprošena, přispomnjenja abo namjety hač do 28.02.2025 zapodać, na př. z mejlku sekretariat@domowina.de. 

Dale je prezidij plan posedźenjow zwjazkoweho předsydstwa schwalił. Z wašnjom je, zo tute po Łužicy pućuja. Tak budu lětuše posedźenja w Choćebuzu, w Slepom, we Wojerecach, w Chrósćicach a w Budyšinje.

Delegowanja

Prezidij je dźensa Julianu Kaulfürstowu jako zastupjerku z Hornjeje Łužicy do kuratorija Myta Ćišinskeho delegował. Domowina je w kuratoriju z dwěmaj čłonomaj – z Hornjeje a Delnjeje Łužicy – zastupjena. Prezidij so dotalnemu zastupjerjej Manfredej Hermašej za dołholětne skutkowanje w tutym gremiju wutrobnje dźakuje. Z Delnjeje Łužicy skutkuje Marion Stenselowa w kuratoriju. Aktualna wólbna perioda zakónči so kónc lěta 2026.

Dale je prezidij dorostowy chór a rejowansku skupinu 1. serbskeje kulturneje brigady delegował. Chór budźe 28.04.2025 – na swjatočnym spominanju za padnjenych pólskich wojakow w času druheje swětoweje wójny – w Chrósćicach spěwać. Rejowanska skupina, kotraž je so w septembrje 2023 znowa załožiła, pojědźe wot 2. – 5. meje 2025 na wubědźowanje do Prahi. Domowina přewza jězbne wudawki za transport.