Hodowny čas leži před nami a zawěsće tež wy swjećiće - w zhromadnosći, w swójbje abo tež cyle za sebje - hodowne dny a z tym narod Jězusdźěćatka.Kóždy čini to na swoje wašnje. A kóždy namaka we swojim wašnju “swój swjedźeń”, “swoju tradiciju” abo “swoju zhromadnosć”. Hdyž na to spominam, dopominam so husto na wobrazy Měrćina Nowaka-Njechorńskeho. Sławneho Serba, kotryž narodźi so před 119 lětami w Njechornju, mamy za wuznamneho molerja. Znate su wšelke jeho mólby powědkowych figurow – kubołćikow, připołdnicy a wódneho muža. Tež wulke wokno ze serbskimi nałožkami w Budyskim Serbskim domje je wón, naš moler z lipowym łopješkom, naćisnył.Čehodla? Je wam znate, zo je Měrćin Nowak-Njechornski tež zhotowił mólby Božich narodkow? Je Božu trójku prosće “zeserbšćił”. Raz běše to Mać Boža w drasće katolskich Serbow, raz Wojerowskeje kónčiny abo z Delnjeje Łužicy. Z wóslika sta so kruwa a z jandźelka kubołćik.Mam to za krasnu mysl. Křesćanski nałožk naroda Chrystusa sta so nam z tym bliši a wosobinsce – cyle, kaž to wot doma – z našeje Łužicy znajemy.Hody su něšto cyle wosobinske a mamy čas so ke kóncej chilace lěto wuhódnoćić.Tež my w Domowinje zhladujemy na zašłe lěto. Běše to dźěłapołne lěto. W měrcu wotmě so hłowna zhromadźizna Domowiny, we wólbach do krajneju sejmow Sakskeje a Braniborskeje smy so wuspěšnje prócowali wo wobkedźbowanje serbskich zajimow, na Serbskich wječorach smy z Wami diskutowali wo naležnosćach, kotrež Was potrjechja, za čas Mjezynarodneho folklorneho festiwala bě Łužica zaso jewišćo cyłeho swěta a w Liberecu zahajitej so Serbske lěće 2019/2020. Za wšě tute zarjadowanja je wjele pomocnych rukow trěbnych štož w padźe zarjada Domowiny rěka: mało ludźi jara wjele dźěła. Dźakuju so na tutym městnje wšitkim pomocnikam a přistajenym Domowiny. Bjez Was a Wašeje prócy njeby třěšny zwjazk tajku wuspěšnu dźěławosć zeskutkownił.Tež naše towarstwa, župy a skupiny su pilni byli a mnoho zarjadowanjow přewjedli, na kotrež su sej husto tež hosći ze wsy přeprosyli. W “Našej Domowinje” čitachmy na přikład wo wulkotnym projekće Domowinskeje skupiny Slepo, hdźež su dwě lěće na zestajenju a přihotach fotoweje wustajeńcy serbskich kwasow we wosadźe dźěłali. Ansamble a skupiny su woswjećili jubileje. Župy a towarstwa su so wobdźělili na sakskim idejowym wubědźowanju a tež po tutym puću serbskim naležnosćam a serbskej rěči k wjace zjawnej kedźbnosću dopomhali. W nowembru je skónčnje serwisowy běrow za komuny w serbskim sydlenskim rumje Sakskeje swoje dźěło zahajił.Dźakuju so Wam, lube Domowinjanki a lubi Domowinjenjo, za wšu Wašu prócu a podpěru. Wy sće rjap serbskeho ludu a kóžde Waše skutkowanje je zdobom wuznaće žiweho serbskeho ludu.Je pak tež wjele njewidźomneho dźěła w pozadku. Mnohe rozmołwy, posedźenja, terminy a zetkanja. Nastajenje posudkow, tworjenje pozicijow a posrědkowanje serbskeho měnjenja je nadawk, kotryž Domowina wšědnje wukonja – hač w Budyšinje, Choćebuzu, Wojerecach, Slepom, Drježdźanach a Podstupimje, w Berlinje abo w Brüsselu. Zakład toho je tež dźěławosć čłonow Zwjazkoweho předsydstwa Domowiny. Tež čłonam a čłonkam gremija dźakuju so wutrobnje za wšu prócu a poradu. Njeličomne hodźiny a wjacore wječory inwestuja do čestnohamtskeho dźěła. Wuslědk wšeho toho móže so widźeć dać: Připóznaće serbšćiny a wědomje, zo ma so serbski lud při rozsudach wobkedźbować, dźeń a wjace stupa. Je to prawy směr – połny dźěła – ale je dobry, a nadźijam so, zo dale zhromadnje po tutym puću kročimy.Za to Wam přeju krutu strowotu a wšo to najlěpše.Što wočakuje nas w přichodnym lěće?W meji móžemy woswjećić 75. róčnicu znowazałoženja Domowiny w Chrósćicach. Budźe to zawěsće wulki wjeršk.2020 wobdźěli so skupina Serbowkow a Serbow na Europeadźe w Rakuskej pola Korutanskich słowjencow. Wjeselu so, zo mamy skónčnje šěrši zakład za wutworjenje našeju mustwow. Přeju jim hižo dźensa wjele wuspěcha.A wjeselu so na dalše Serbske wječorki a wuměny z čłonstwom a serbskim ludom. Hižo dźensa chcu Was přeprosyć, zo byšće nam powědali, što was poćežuje, kajke ideje maće a što derje běži. Za kóždu mysličku smy dźakowni a nad kóždej rozmołwu so wjeselimy.W mjenje Domowiny – Zwjazka Łužiskich Serbow přeju Wam radostne a hnadypołne hodowne dny. Přeju Wam strowotu, měrny čas a wjele mocow do noweho lěta.Waš předsyda Domowiny, Dawid Statnik W Budyšinje, 20. decembra 2019