Doporučenja hotowarničow serbskokatolskeje narodneje drasty je nětko župa „Michał Hórnik” wozjewiła. Regionalna rěčnica Katharina Jurkowa, kotraž je lisćinu praktiskich pokiwow na zakładźe zarjadowanja župy 5. měrca w Chrósćicach zestajiła, so k tomu wupraja: „Naša narodna drasta je žiwe zhromadne duchowno-kulturne kubło. Tohodla běše župje wažne, nazhonjenja hotowarničow we wuměnje hromadu wjesć, wšako njemóže „standard“ někak „wot horjeka“ postajeny, ale dyrbi wupłód dojednanja fachowčow być. Je cyle normalne, zo w běhu tajkeho dlěšeho procesa ke korekturami a wudospołnjenjam dóńdźe. Nětk pak je konsens, zo je prěni dźěl doporučenjow najprjedy dozrawjeny. Zajimcy pokiwy za křćeńsku kmótru, prěnje swjate woprawjenje, firmowanje, žarowanje, Bože ćěło a putnikowanje do Róžanta nadeńdu. Hišće njejsu wšitke składnosće kaž na přikład kwas zapřijate, tohodla budźe koło hotowarničow ze swojej dźěławosću pokročować.Doporučenja njech na jedym boku přinošuja dostojnemu zdrasćenju, tohodla hotowarniče jeničce na narodnu drastu samu njedźiwaja, ale tež na zadźěwanje wšemu, štož porjadny napohlad myli, na přikład sportowe črije, nawušne debjenki, napadnje lakěrowane nochće – a druhdy dyrbi so tež prajić, zo so kusanje žwjenkačkow njesłuša. Na druhim boku nam prawe wužiwanje zapřijećow za jednotliwe dźěle našeje katolskeje narodneje drasty na wutrobje leži. Naša maćeršćina a naša drasta jako wuraz nabožiny a narodnosće na přirodne wašnje žiwy cyłk tworitej. To chcemy swěru pěstować a při wšěch wjerškach našeho žiwjenja nałožować, wšako narodna drasta do našeje serbskokatolskeje identity a towaršnostneje jednoty słuša.” Tule w přiłoze: Dokumentacija doporučenjow koła hotowarničow serbskeje katolskeje narodneje drasty. (PDF)