Srjedu, 24.4. zahaji so seminar dźěłoweje skupiny “non-kin-state” pod třěchu Federalistiskeje unije europskich narodnych mjeńšin w Lubnjowje. Składnostnje tutoho wužichu čłonojo prezidija Domowiny dźensa móžnosć, swoje posedźenje w Lubnjowje – městačko, kotrež bu w lěće 950 jako wjes wudźerjow znate – přewjesć. Jutře chcedźa so potom na seminarje wobdźělić.

Domowina ma wotpohlad, wusahowace přikłady za wužiwanje serbšćiny we wobłuku hospodarstwa z nowym mytom hódnoćić. Minjeny nowember je zwjazkowe předsydstwo hižo prěnje namjety za porjad diskutowało. W dalšim procesu je wuběrk za naležnosće změny strukturow, hospodarstwo a infrastrukturu wotpowědny porjad za spožčenje “Myta za hospodarstwo” wobdźěłał. Na dźensnišim posedźenju su čłonojo prezidija doskónčny namjet wothłosowali. Zwjazkowe předsydstwo móže tuž tutón na swojim přichodnym wuradźowanju 07.06. diskutować.

Mjez dalšimi temami, kotrež je prezidij diskutował, běchu tež wólbne kopolaki za wólby krajneho sejma Sakskeje dnja 01.09.24 a Braniborskeho sejma dnja 22.09.24. Třěšny zwjazk je na wšelakorych pućach zjawnosć přeprosył, prašenja na politiske strony, kotrež so za wólby sejmow staja, zapodać. Prezidij je so dźensa na dźesać prašenjow dorozumił, kotrež so nětko politiskim stronam sposrědkuja. Wólbne kopolaki měrja so na přikład na kubłanske naležnosće abo wužiwanje serbšćiny na digitalnym polu. Ručež wotmołwy předleža, Domowina je wozjewi.