Dnja 11.03.2021 zeńdźeštaj so Tobias Bilz, krajny biskop Ewangelsko-lutherskeje krajneje cyrkwje, a Dawid Statnik, předsyda Domowiny, na rozmołwu w sydle biskopa w Drježdźanach. To bě zdobom prěnja rozmołwa mjez biskopom, kiž bu lěta 2020 woleny, a zastupjerjom serbskeho ludu. Wuchadźišćo rozmołwy bě list předsydy Domowiny.W dwuhodźinskej rozmołwje, na kotrejž so tež wyši cyrkwinski rada dr. Thilo Daniel wobdźěli, wopisowaše Statnik stawizny a aktualnu situaciju serbskeho ludu. „Sym składnosć wužił, biskopej situaciju serbskeho ludu wobšěrnje rysować“, Statnik praji. „Sym tež wuzběhnył, zo je cyrkej mnohim Serbam - nimo swójby a kubłanskeho wobłuka - wažny rěčny rum. Naša rěč je nam najwažniši wuraz identity.“Hladajo na situaciju ewangelskich wosadow w serbskim sydlenskim rumje Statnik doporuči, so do rozmołwy ze Serbskim wosadnym zwjazkom podać, kotryž je po Serbskim zakonju Ewangelsko-lutherskeje krajneje cyrkwje Sakskeje zastupjer specielnych naležnosćow ewangelskich Serbowkow a Serbow w cyrkwi a zjawnosći. W rozmołwje měło předewšěm wo to hić, kak so wozjewjenje Božeho słowa a dušepastyrstwo w serbšćinje w nowej strukturje wosadow nadal zaruča a spěchuje. Tule Statnik doporuča, po přikładźe Swobodneho stata Sakskeje paket naprawow za spěchowanje serbšćiny zestajeć w tym zmysle, zo wobě stronje naprawy a zaměry za spěchowanje serbskeje rěče definujetej.Krajny biskop Bilz dźakowaše so za impulsy, namjety a za wotewrjenu rozmołwu. A wuži składnosć, dotalne wuwiće a z nim zwisowace wobzamknjenja hišće raz wobswětlić. Bilz praji: „Ewangelscy Serbja su ze swojimi bohatymi tradicijemi a čiłym duchownym žiwjenjom dźensa sylny dźěl našeje krajneje cyrkwje w Hornjej Łužicy. Aktualne změny strukturow sposrědkuja wažny nastork za dalše rozmyslowanja wo tym, z kotrymi naprawami hodźi so to, štož tu je, sylnić a móhło so noweho wuwiwać.“Statnik budźe Serbskemu wosadnemu zwjazkej wo wobsahach a wuslědkach rozmołwy rozprawjeć a k tomu praji: „Dźakuju so, zo je so knjez biskop Bilz na našu próstwu z nami rozmołwjał. Rozmołwa bě dobra, na samsnej runinje. Sym z njeje tež wusłyšał, zo su naše naležnosće cyrkwi njedźiwajo ćežkich wobłukowych wuměnjenjow, kotrež sej cyrkej tež njeje wupytała, wědome a zo chce na nje tež w měnjacych so strukturach dźiwać. Na to móžemy so spušćeć.“Wšitcy třo partnerojo rozmołwy běchu sej na kóncu přezjedni, zo je wozjewjenje Božeho słowa w našej maćeršćinje najwažniša naležnosć a zdobom prawo serbskich wosadnych. We wšěch dalšich zhromadnych přemyslowanjach ma tuta naležnosć w srjedźišću stać. foto: Krajny biskop Tobias Bilz, předsyda Domowiny Dawid Statnik a wyši cyrkwinski rada dr. Thilo Daniel (w.p.)