Na dnjowym porjedźe prezidija Domowiny srjedu wječor we Wojerecach pod nawodom předsydy Dawida Statnika stejachu přihoty na lětuše posedźenje poradźowaceho wuběrka za prašenja serbskeho ludu poboku zwjazkoweho ministerstwa nutřkowneho 13. meje. Zakład tutoho wuradźowanja je prawidłownje rozprawa předsydy Domowiny wo połoženju serbskeho ludu, na kotrymž so zarjad tuchwilu zaso dźěła. Wažna tema při tym je wobkedźbowanje serbskich zajimow w procesu změny struktury Łužicy: W ramiku přichodneho financneho zrěčenja za Załožbu za serbski lud wot 2021 měła so prezenca serbšćiny w digitalnym swěće zaručeć. Zdobom so Domowina za regionalizowanje spěchowanja rěče a serbskeje identity zasadźuje. Hišće njerozrisane je prašenje prawa serbskich žonow na wužiwanje swojeho mjena, potajkim scomter wotpowědnymi kóncowkami, na hamtskich dokumentach. Tohodla třěšny zwjazk so dale za tajku změnu zakonja angažuje. Dale chce so Domowina za zakótwjenje škita awtochtonych narodnych mjeńšin w zakładnym zakonju Němskeje zasadźować. Z tym so tež stajnje mjeńšinowa rada zaběra, kotrejež předsyda je tuchwilu předsyda Domowiny, Dawid Statnik. Składnostnje 150. posmjertnin Handrija Zejlerja a 200. narodnin Korly Awgusta Kocora so 2022 lěto Zejlerja a Kocora wotměwa. Domowina wšelake aktiwity na přikład ze stron Serbskeho ludoweho ansambla podpěruje a župy a čłonske towarstwa namołwja, hač do kónca lěta 2020 referentej za kulturne naležnosće a wukraj, Clemensej Škodźe, dalše namjety přepodać. Předsyda Dawid Statnik informowaše, zo budźe štwórtk, 26. měrca, w 17 hodź. w domje Domowiny we Wojerecach lětuše wuradźowanje z předsydami přisłušnych towarstwow. Jako ćežišća su předwidźane dotalne wuslědki diskusije wo změnach wustawkow třěšneho zwjazka, zwoprawdźenje nadawkow dźěłowych směrnicow a přihoty klětušeje hłowneje a wólbneje zhromadźizny Domowiny.