Lětsa budźe zaso dźeń wotewrjenych duri w domje Měrćina Nowaka w Njechornju. Čłonojo župneho předsydstwa župy „Jan Arnošt Smoler” Budyšin chcedźa wot pandemije přetorhnjenu tradiciju zaso sobotu, 9. Julija, dale wjesć a wšitke župy a towarstwa k tomu přeprosyć. Leńka Thomasowa jako amtěrowaca rěčnica župy chwaleše na posedźenju srjedu, 6.4., benefičny koncert na dobro woporow ruskeje wójny přećiwo Ukrainje, kotryž je so w měrcu w Budyskej „Krónje” wotměł, a dźakowaše so za iniciatiwu Towaršnosće k spěchowanju Serbskeho ludoweho ansambla, Jurjej Łušćanskemu za podpěru a Lucianej Kaulfürstej za sobuskutkowanje w programje.

Dale so čłonojo předsydstwa wo tym wuměnichu, kotre poskitki Domowinskim skupinam hodźeli so organizować – na př. přednoški wědomostnikow ze Serbskeho instituta abo předstajenja serbskich filmow. Regionalna rěčnica Katja Liznarjec informowaše, zo je lětsa pjeć skupinow próstwu wo pawšalne spěchowanje zapodało, zo bychu w běhu lěta serbske zarjadowanja přewjedli. Přichodne wuradźowanje župneho předsydstwa budźe spočatk meje pola motiwatora za tworjenje rěčnych rumow w kónčinje wokoło Malešec, Luciana Kaulfürsta w Přiwćicach.