Namołwa za wubědźowanje wo ideje „Sächsischer Mitmach-Fonds/ Čin sobu – Sakski fonds“ w nalěću 2019 nětko kompletnje w serbskej rěči předleži. Wona je wozjewjena pod https://www.mitmachfonds-sachsen.de/wettbewerb/lausitz-sorbisch.Zwjazkowe předsydstwo Domowiny je na swojim posedźenju dnja 15. měrca w Chrósćicach župy a čłonske towarstwa Domowiny namołwiło, so na tutym wubědźowanju wo ideje wobdźělić. Hač do 15. apryla móžeja so jednotliwcy, towarstwa, nošerjo socialneho dźěła, šule kaž tež komunalne a wědomostne zarjadnišća ze swojimi idejemi za strukturne wuwiće Łužicy požadać. W kategoriji (4) Łužica – žiwa dwurěčnosć so ideje a namjety premuja, kotrež spěchuja wužiwanje serbskeje rěče a sylnjenje serbskeje identity a z tym pomhaja serbskorěčne zhromadźenstwo skrućić. Wo mytowanju rozsudźi přidatna jury.