Pjatk wječor je so Zwjazkowe předsydstwo (ZP) Domowiny posledni raz do – pandemije dla přestorčeneje – hłowneje a wólbneje zhromadźizny třěšneho zwjazka zešło. Posedźenje běše zaso přewažnje ditgitalne: Přihladowarjo móžachu je přez livestream na Youtube sćěhować, čłonojo gremija so na nim pak doma před wobrazowku pak na žurli Serbskeho domu w Budyšinje wobdźělichu. Normalnje ZP ze swojimi wuradźowanjemi po Łužicy pućuje a so w přitomnosći hosći z regiona schadźuje; to wot lońšeho nalěća pod wuměnjenjemi pandemije hižo móžno njeje. Tohodla so posedźenja w interneće wusyłaja a wěsty čas po tym hišće k dispoziciji steja. Tak je sej přerěznje něhdźe 150 ludźi kóžde tute posedźenje w serbskej rěči wobhladało a słyšało.

Dźakowano digitaliziciji dale a wjetši zjawny zajim za posedźenja ZP

 W tutym zwisku zwěsća předsyda Domowiny, Dawid Statnik, „zo smy jako Zwjazk Łužiskich Serbow na wjacore wašnje načasne srědki digitalizacije tak wužiwali, zo je so rezonanca přewšu měru stopnjowała. To płaći runje tak za wobdźělenje čestnohamtskich na posedźenjach našich gremijow. Najebać toho, zo so wšitcy na čas po kóncu pandemije wjeselimy, hdyž budźemy so zaso z wjac ludźimi bjezposrědnje zetkawać móc, sym přeswědčeny, zo budźe digitalna komunikacija tež w přichodźe pola nas wjetšu rólu hrać hač w času do měrca 2020. Runje ludźom, kotřiž maja nimo swojeho čestnohamtskeho skutkowanja wjele swójbnych a powołanskich nadawkow, je to wulke wolóženje, zo njetrjebaja hižo telko hodźin w awće po puću być, zo bychu na posedźenje jěli.”

#slepo120621 Hłowna zhromadźizna – kandidatury za organy Domowiny

So wě, zo je so ZP dalšim přihotam na hłownu zhromadźiznu wěnowało, kotraž so sobotu, 12. smažnika (junija), w ćěłozwučowarni němsko-serbskeho šulskeho kompleksa w Slepom wotměje. Serbske towarstwa a zwjazki su nadal namołwjene, kandidatow za wólby do organow Domowiny pomjenować, wosebje wězo za zwjazkowe předsydstwo. Měsac do hłowneje zhromadźizny, potajkim 12. róžownika (meje), třěšny zwjazk započnje, kandidatow na swojej internetnej stronje www.domowina.de předstajić. Domowina wšěch kandidatow prosy, foto, krótke předstajenje („Ja sym …“) a wopodstatnjenje kandidatury („Kandiduju, dokelž”...), kóžde z maksimalnje 300 znamješkami, na adresu marcel.brauman@domowina.de pósłać. Paralelnje budźemy w socialnych syćach wot 12.5. pod hashtagom #slepo120621 stajnje informacije, kiž hłownu zhromadźiznu nastupaja, šěrić.

Marka Cyžowa, předsydka wuběrka za zjawnostne a lobbyjowe dźěło, kotraž za zwjazkowe předsydstwo hižo njekandiduje, so wšěm za dobre zhromadne dźěło podźakowa. Wosebje jej na wutrobje leži, zo je a wostanje tež tón gremij intaktny serbski rěčny rum. Tohodla sej přeje, zo budźe tež młoda generacija serbšćinu w narodnym dźěle swěru dale nałožować a pěstować. 

Nowa referentka Domowiny za naležnosće kubłanja a spěchowanja dorosta

 W njezjawnym dźělu posedźenja je ZP wažnej personelnej rozsudaj tworiło. Čłonojo wolachu na namjet jednaćela Katrin Suchec-Dźisławkowu (44) jako referentku za naležnosće kubłanja a spěchowanja dorosta. Wona swoje nowe dźěło 1. julija nastupi. Mać pjeć dźěći bydli ze swójbu w Chasowje a dźěłaše dotal jako prawiznica a w nawjedowacej funkciji institucijow w Budyšinje a Wojerecach. Wona je hižo wjele lět čłonka zwjazkoweho předsydstwa Domowiny, předsydka wuběrka za politiske a prawniske naležnosće a sobuzałožerka towarstwa Staršiska iniciatiwa Radwor z.t., komuž wona zhromadnje z Witom Bejmakom předsydari. Po mnohich lětach prócowanja je so třěšnemu zwjazkej radźiło, tute zastojnstwo na zarjedźe prěni raz wupisać. Katrin Suchec-Dźisławkowa ma mjez druhim zwisk ke wšěm kubłanišćam ze serbskim poskitkom po cyłej Łužicy hajić. Na swojim prěnim dźěłowym dnju chce wona w Delnjej Łužicy přebywać.

Nowy docent za hornjoserbšćinu w Rěčnym centrumje WITAJ

 Dalšemu personelnemu namjetej sćěhujo je ZP Mareka Krawca (49) jako prěnjeho docenta wobkrućiło, kiž je eksplicitnje za podawanje kursow hornjoserbšćiny w Rěčnym centrumje WITAJ (RCW) w nošerstwje Domowiny přistajeny. Wón srjedź meje w Budyšinje swoje nowe městno nastupi. Marek Krawc je w Serbach hižo znaty jako prawidłowny rozprawjer za nowiny z Prahi a jako nawoda digitalneho kursa serbšćiny za 14 započatkarjow w Delnim Wujězdźe. Wón čerpa z wjele lět nazhonjenjow w rěčnym kubłanju dorosćenych. Tež tute dźěłowe městno bu hakle přez polěpšene financne wuhotowanje Załožby za serbski lud móžne. Dawid Statnik: „Z kompetentnym wobsadźenjom tuteju noweju dźěłoweju městnow Domowina pokazuje, zo nam dowěrjene srědki za skrućenje, wožiwjenje a dalše wuwiwanje našeje maćeršćiny zaměrnje nałožujemy. Přejemy Katrin Suchec-Dźisławkowej a Marekej Krawcej wjele zboža do noweho zamołwiteho zastojnstwa!”  

wobraz: Katrin Suchec-Dźisławkowa. foto: Domowina.