Štwórtk je Halena Jancyna prěni raz jako nowa społnomócnjena za serbske naležnosće wokrjesa Budyšin Domowinu wopytała. W dźěłowej rozmołwje z předsydu třěšneho zwjazka, Dawidom Statnikom, a jednaćelom Markom Kowarjom w Serbskim domje Budyšin su woni wo móžnosćach kooperacije rěčeli. Dawid Statnik po tym praješe: “Je so drje zašłe lěta w Budyskim wokrjesu tójšto na dobro Serbow hibało. Ale runoprawna dwurěčnosć dawno hišće normalita njeje, a tohodla so wjeselimy, zo mamy zaso kompetentnu partnerku w krajnoradnym zarjedźe, kotraž móže na skutkowanje swojeje předchadnicy Reginy Krawcoweje nawjazać. Wězo so dale za to zasadźujemy, zo budźe bórze połne městno za tutón naročny nadawk, zwyšenje na třiceći hodźin tydźensce je prěni postup.”