Štwórte a zdobom lětuše poslednje čisło informaciskeho łopjena „Naša Domowina“ je nětko wušło. Hłowne temy su lětuše wuznamjenjenske zarjadowanje Domowiny, dalše dźěło z wuslědkami naprašowanja čłonow wšitkich towarstwow a zwjazkow kaž tež – wosebje w rozšěrjenym digitalnym dźělu – rěčna situacija a rěčne planowanje. Dalše přinoški skića dohlad do skutkowanja župow a towarstwow, kaž běchu to na přikład serbski wječor we Wulkej Dubrawje, wustajeńca z fotami serbskich kwasow w Slepjanskej wosadźe (wona pokazuje so hišće hač do kónca februara w tamnišim Serbskim kulturnym centrumje), nowa turistiska karta ze serbskimi poskitkami, dworowy swjedźeń w Ćisku kaž tež nazymski koncert Serbskeho folklorneho ansambla Slepo, kotryž bě Alfonsej Jancy a Korli Tilichej wěnowany. Nic naposledk informuje Domowina wo personelnych změnach w swojim zarjedźe. “Naša Domowina” je wozjewjena tule na web-stronje Domowiny. Abonenća Serbskich Nowin a Noweho Casnika dóstanu 4-stronske ćišćane wudaće w přichodnymaj tydźenjomaj ze swojej nowinu.