Zwjazkowe předsydstwo (ZP) je na swojim posedźenju pjatk próstwje wokrjesa Dubja-Błota (LDS) wo spěchowace čłonstwo w třěšnym zwjazku Łužiskich Serbow jednohłósnje přihłosowało. Z tym je prěnja teritorialna korporacija z čłonom Domowiny. To běše zdobom prěnje wobzamknjenje wječora, po tym zo je krajny rada LDS, Stephan Loge, srjedu w Lubinje předsydźe Domowiny, Dawidej Statnikej, oficielnje dokument přepodał – jako wuslědk jednohłósneho wotuma jich wokrjesneho sejmika. Statnik hódnoćeše to jako „historiski postup w němsko-serbskej zhromadnosći a jasny signal: Serbstwo je jako jónkrótnosć Łužicy a fundament regionalneje identity mjeztym runje tak připóznate kaž rěčnica serbskeho ludu, třěšny zwjazk Domowina.”Dwanaće čłonow ZP je so přez widejokonferencu na wuradźowanju na žurli Serbskeho domu w Budyšinje wobdźěliło, kotrež bu prěni raz přez livestream internetnje wusyłane. Posedźenje bě krutych postajenjow wokrjesa přiwótřeneje situacije korona-krizy dla přikrótšene a je so hižo w 21 hodź. skónčiło – hewak je z wašnjom, so hač do 22 hodź. schadźować. Najebać to tworješe zwjazkowe předsydstwo wjele rozsudow mjez druhim wo klětušej hłownej a wólbnej zhromadźiznje, kluču delegatow, modusu wólbow ZP za dobu 2021-2025, naćisku dźěłowych směrnicow Domowiny za dobu 2021-2023, rozprawje wo zwoprawdźenju nadawkow dźěłowych směrnicow w dobje 2019-2021 a hospodarskim planje za klětu. Dotal za 27.3.2021 planowanu hłownu zhromadźiznu su pandemije dla přestorčili; prezidij je nadawk dóstał, nowy termin namakać. Za dalše wobdźěłanje dźěłowych směrnicow so doba zapodaćow namjetow podlěši a redakciska skupina wutwori, kiž ma předležace na nowe namjety zadźěłać.Dale zaběrachu so čłonojo gremija z informaciju wo digitalnej zhromadźiznje FUEN, ze stawom wobjednawanja europskeje wobydlerskeje iniciatiwy Minority SafePack, naprawami změny strukturow we Łužicy a z njedawnym posedźenjom poradźowaceho wuběrka za prašenja serbskeho ludu poboku zwjazkowemu ministerstwu nutřkowneho, na kotrehož dnjowym porjedźe rozprawa předsydy Domowiny wo połoženju serbskeho ludu steješe.W njezjawnym dźělu wěnowaše so zwjazkowe předsydstwo financam Załožby za serbski lud. Po tym praješe předsyda Domowiny, Dawid Statnik: „So wě, zo witamy dotalnej wobzamknjeni Zwjazka a Braniborskeje, kotrejž su dotalne přiražki załožbje wo štwórćinu zwyšiłoj a z tym faktiske skrótšenja zašłeju lětdźesatkow někak wurunałoj.Wočakujemy, zo swobodny stat Sakska swojej dotalnej politice swěrny wostanje a swój podźěl na financowanju załožby dale wjedźe. Dyrbimy změnu strukturow we Łužicy za skrućenje a dalewuwiwanje regionalych rěčnych rumow wužiwać, tam nam tójšto dźěła do rukow hlada a je najwjetši čas, po cyłej Łužicy projekty a struktury za rewitalizaciju serbšćiny we wšědnym žiwjenju natwjarjeć. Tu ma załožba ze swojimi srědkami přinošować, ale tež zwjazk na zakładźe swojeho zakonja za zesylnjenje strukturow, w kotrymž je serbski lud wuraznje naspomnjeny. Njeńdźe wo jałmožnu, ale wotškódnjenje našemu ludu, kiž je wudobywanja brunicy dla 130 serbskich wjeskow přisadźił.” W přiłoze: Aktualna nowinska zdźělenka wokrjesa Dubja-Błota wo rozsudźe zwjazkoweho předsydstwa, wokrjes jako spěchowaceho čłona do Domowiny přiwzać.