Česćene knjenje, česćeni knježa, lube koleginy a kolegojo,

přeprošamy Was po tutym puću wutrobnje na nowinarsku rozmołwu dnja 4. septembra, 14 hodź. do Budyskeho Serbskeho doma, Póstowe naměsto 2, stwa 106.

Mamy za to dwě dobrej přičinje:

1.)   Konferencu k strukturnemu wuwiću Łužicy z wida Serbow, kiž budźe dnja 13. a 14. septembra w Złym Komorowje. Z politikarjemi wšelakich runin, wědomostnikami, a wšěmi zajimcami chcemy tam wo přichodźe našeje domizny diskutować.
Wo wotběhu a zaměrach konferency informuja Was předsyda Domowiny Dawid Statnik, decernentka w Krajnoradnym zarjedźe Zhorjelc Heike Zettwitz a referent Domowiny za hospodarstwo Pětr Brězan.

2.)   Nazymu chcemy přewjesć naprašowanje čłonow serbskich towarstwow a zwjazkow. Naprašnik bu w zašłych měsacach wuwity a wobjedna so na posedźenju Zwjazkoweho předsydstwa Domowiny dnja 31. awgusta. Dawid Statnik a předsydka zamołwiteho wuběrka za zjawnostne a lobbyjowe dźěło zwjazkoweho předsydstwa Marka Cyžowa předstajitej zaměr naprašowanja, wobsah a wotběh a stejitaj Wam za prašenja k dispoziciji.

Wjeselimy so na Waše wobdźělenje na nowinarskej rozmołwje 4. septembra w Budyskim Serbskim domje.