Jako zastupjerjow serbskeje młodźiny na lětušim posedźenju poradźowaceho wuběrka za prašenja serbskeho ludu poboku zwjazkoweho ministerstwa nutřkowneho pomjenuje prezidij Domowiny štyrjoch młodostnych: Ellu Bergelec, studentku prawnistwa, tuchwilu w Amsterdamje, Katju Hrjehorjec, studentku filozofije a dźiwadłowych wědomosćow w Hildesheimje, Maximiliana Grubera, šulerskeho rěčnika na Serbskim gymnaziju w Budyšinje, a Kita Pawlika, šulerja z Berlina.Dale su čłonojo gremija po organizatoriskich naležnosćach lětušeje hłowneje zhromadźizny wobšěrny naćisk rozprawy wo zwoprawdźenju dźěłowych směrnicow 2019-2021 schwalili. Dźěłowe směrnicy 2021-2023 su woni wo tón dypk rozšěrili: „Domowina wobara so zhromadnje z druhimi partnerami raznje přećiwo tomu, we Łužicy doskónčny skład za atomowe wotpadki zaměstnić.” Župy a serbske towarstwa su dale namołwjene, wosebje kandidatki za wólby přichodneho zwjazkoweho předsydstwa nastajić. Po hłownej zhromadźiznje chcedźa so wolóženju dźěławosće čestnohamtskich čłonow gremijow wěnować.Předsyda Domowiny, Dawid Statnik, a předsydka Rady za nastupnosći Serbow kraja Bramborska, Kathrin Šwjelina, staj w zhromadnym lisće frakcije krajneho sejma w Podstupimje prosyłoj, namjet frakcijow Lěwicy a swobodnych wolerjow podpěrać, kiž so za europsku wobydlersku iniciatiwu Minority SafePack najebać wotpokazanje ze stron Europskeje komisije zasadźuje. Tón namjet je wjetšina parlamenta dźensa wotpokazała. Prezidij wita zhromadny namjet koaliciskich frakcijow Braniborskeje, SPD, CDU, Zelenych a opoziciskeje frakcije Lěwicy za koncept wjacerěčnosće kraja, kotryž steji štwórtk na dnjowym porjedźe krajneho sejma. Tež za přiwzaće tutoho namjeta staj w lisće wabiłoj.Třěšny zwjazk Serbow so angažuje za rozšěrjenje zawjazkow Braniborskeje a Sakskeje nastupajo Europsku chartu za regionalne abo mjeńšinowe rěče. Z namjetom ma so po prezidiju nětko wuběrk za politiske a prawniske naležnosće zaběrać. Domowina wobdźěli so zdobom na tak mjenowanej implementěrowanskej konferency zwjazkoweho ministerstwa nutřkowneho, kiž so mjeztym ze sposrědkowanjom wědy wo narodnych mjeńšinach po wučbnych planach šulow zaběra. Hladajo na wólby zwjazkoweho sejma chce Domowina wólbne kopolaki Mjeńšinoweje rady ze swójskimi naprašowanjemi regionalnym kandidatam wo bytostnych serbskich temach wudospołnić. Nimo toho planuja po móžnosći hišće za čas pandemije zjawny forum, zo bychu Serbja bjezposrědnje z kandidatami diskutować móhli. Prezidij Domowiny dźakuje so sakskej kulturnej ministerce Barbara Klepsch za jeje jasne słowa w zwisku z podpisanjom 4. financneho zrěčenja Załožby za serbski lud ze stron sakskeho statneho knježerstwa wutoru. Předsyda Domowiny wupraja tež něhdyšej předsydce Serbskeje rady Sakskeje, Mari Michałkowej, a Zuzan Šenkec, předsydce załožboweje rady, wutrobny dźak za dołholětny angažememt, kotryž je k tomu wjedł, zo je runje w dobje změny strukturow dołhodobnje infrastruktura za serbsku rěč a kulturu po cyłej Łužicy zaručena. Gremij dale namjetuje kulturnemu konwentej kulturneho ruma Hornja Łužica – Delnja Šleska, znowa Marka Sucheho jako wěcywustojneho kulturneje přirady we wobluku hladanje domizny tež za dobu 2021-2026 pomjenować.