Na dnjowym porjedźe dźensnišeho posedźenja stejachu wšelake dypki, kotrež su hišće w dźěłowym procesu. Jedna tajka tema je zběranje prašenjow za wólbne kopolaki Domowiny za klětuše wólby Braniborskeho a Sakskeho krajneho sejma. 

Dalša tema bě wobdźělenje Domowiny na słowjanskim seminarje FUEN w Zagrebje, na kotrymž so jednaćelka Judit Šołćina a městopředsyda dr. Hartmut Leipner wot 19. do 22.10. wobdźělitaj. Hosćićel lětušeho seminara je serbiska mjeńšina w Chorwatskej. W tutym zwisku diskutowachu čłonojo prezidija rólu Domowiny w FUEN. Tuchwilu je Domowina w štyrjoch dźěłowych skupinach FUEN zastupjena. Prezidij podpěra kandidaturu dr. Hartmuta Leipnera za nawodnistwo słowjanskeje dźěłoweje skupiny. Dotalna rěčnica je přizjewiła, zastojnstwo złožić.

Nimo toho bě sej prezidij wědomostneho sobudźěłaćerja projekta ZARI, Juliana Nyču na rozmołwu přeprosył, zo by wo aktualnym stawje projekta zhonił.