Prezidium Domowiny jo se stwórtk, 7.4., do Barlinja pódał, aby se w zwězkowem sejmje wustajeńcu „Co groni how mjeńšyna? ” wó pśipóznatych awtochtonych mjeńšynach Nimskeje woglědali, kótaraž buźo pó wšych zwězkowych krajach drogowaś. Pótom su se až do wótpołdnja ze wšyknymi wótpósłańcami-cłonkami parlamentariskeje pśirady Załožby za serbski lud rozgranjali: ze Sylviju Lehmann a Simonu Koß (wobej SPD), dr. Christianu Schenderlein a Knutom Abraham (wobej CDU).

Mimo togo su se ze sobuźěłaśerjoma běrowa cłonka nutśikownego wuběrka zwězkowego sejma, Lindu Teuteberg (FDP), a z cłonkom póraźujucego wuběrka za serbske nastupnosći, Merlu Spellerberg (Zelene), zmakali. Delegaciji prezidije su pśisłušali zastupujucej pśedsedarja Domowiny, Marko Hančik a dr. Hartmut Leipner, jadnaŕka Judit Šołćina, zastupujucy jadnaŕ Marcus Końcaŕ a referentka za nastupnosći kšywowego zwězka Madlenka Di Sarnowa.

Wuslědki źěłowego programa zespomina zastupujucy pśedsedaŕ Domowiny, dr. Hartmut Leipner:

„Wustajeńca dajo na zwězkowej rowninje wažny doglěd do źinsajšnego swěta wšyknych pśipóznatych mjeńšynow w Nimskej. Titel wustajeńce se mě wósebnje spódoba, dokulaž pósrědnijo naš wid wót nutśika – ga njecujomy se ako ,mjeńšyna’, abo ako mjenjej gódne.

Rědnje, až smy móžnosć měli, se rozgranjaś ze wšakimi politikarjami wó wažnych serbskich temach, ako na pśikład rewitalizacija rěcy, pšawo na serbske mjenja a strukturna změna."