Bernd Melcher jo nowy wjednik wótźělenja za rěcny marketing, wědomnostne źěło a rěcne projekty wótźělenja Rěcnego centruma WITAJ (RCW) w Chóśebuzu. To su rozsuźili cłonki zwězkowego pśedsedaŕstwa (ZP) Domowiny pětk wjacor na prědnem lětosnem pósejźenju, kenž jo se hybridnje – połojca wobźělnikow w zalu Serbskego domu w Budyšynje a połojca digitalnje – wótměwało. 52-lětny ženjony nan tśich źiśi źěła južo dwě lěśe gromaźe z Aleksaderom Dragułu ako komisariski wjednik chóśebuskego wótźělenja a połtera lětźasetka ako zagronity redaktor dolnoserbskego casopisa za źiśi “Płomje”.

Dr. Beata Brězanowa, wjednica Rěcnego centruma WITAJ (RCW) : “Wjaselim se, až jo městno wjednika wótźělenja za rěcny marketing, wědomnostne źěło a rěcne projekty we   wótźělenju Rěcnego centruma WITAJ w Chóśebuzu něnto wobsajźone. Rownocasnje som źěkowna, až jo był cas komisariskego nawjedowanja wjelgin spómóžny. Wažne rozsuźenja wó wusměrjenju źěłabnosći dalej we wjednistwje RCW twórimy. Pśesajźenje rozsuźenjow pak buźo zaměrnjej móžne, gaž móžo se nowy wjednik kradu swójomu nadawkoju pśiwobrośiś – něnt wupišo RCW městno redaktora za ´Płomje´. Nježlic njebuźo toś ta funkcija znowa wobsajźona, wupołnjujo Bernd Melcher ten nadawk.” 

Foto: Bernd Melcher / foto: RCW