Zjawnych zarjadowanjow drje lědma je, najebać to dźe žiwjenje tež w politiskim dźěle Domowiny dale. Tak měješe předsyda třěšneho zwjazka Łužiskich Serbow wčera, mjez druhim tež w swojim zastojnstwje jako předsyda mjeńšinoweje rady, rozmołwje na mjezynarodnej a zwjazkowej runinje. Póndźelu dopołdnja staj so předsyda Domowiny, Dawid Statnik, a prezident FUEN, Loránt Vincze, wo situaciji mjeńšin za čas korona-pandemije rozmołwjałoj. W telefonaće je so Vincze Serbam dźakował, zo su woni dale „aktiwny stołp dźěławosće FUEN, wosebje tež w zhromadnym dźěle słowjanskich mjeńšin.” Dźakowano postupej digitalizacije w mjezynarodnej organizaciji je so wobdźělenje na wuradźowanjach porno prjedawšim časam polěpšiło. Najwažniši přichodny termin je wobjednawanje europskeje wobydlerskeje iniciatiwy FUEN, Minority SafePack, 14. decembra w europskim parlamenće. Vincze a Statnik widźitaj za to njedawny jednohłósny wotum zjazkoweho sejma jako wažnu podpěru.Póndźelu popołdnju so digitalne wuradźowanje mjeńšinoweje rady a zwjazkoweje centrale za politiske kubłanje wotmě. Ze stron mjeńšinoweje rady běchu předsyda Dawid Statnik, zastupjer saterfrizow, Karl-Peter Schramm, a sobudźěłaćerka mjeńšinoweho sekretariata, Nele Feuring, wobdźěleni. Jich partner za rozmołwa běše Thomas Krüger, prezident zwjazkoweje centrale za politiske kubłanje. Statnik hódnoćeše wobkedźbowanje mjeńšin w dźěle centrale na přikładźe jeje publikacijow wo změnje strukturow Łužicy a Serbach. Jedna tych temow rozmołwy běše prašenje, kak a hdy bychu woni Wahl-O-Mat tež w rěčach awtochtonych mjeńšin Němskeje poskićić móhli.