Tež serbski podźěl budźe na lětušim Dnju Saksow, kotryž wotměje wot 1. do 3. septembra w Aue-Bad Schlema prezentny. Na „serbskim“ stejnišću předstajeja Serbska kulturna informacija, towarstwje Serbski kulturny turizm a Serbski folklorny ansambl Wudwor kaž tež zarjad Domowiny serbsku kulturu a rěč. Tež serbski dener so přez Wawrikec catering poskići. Njedźelniši program wobrubja Wudworscy rejowarjo w 16.30 hodź. na jewišću towarstwow.

Aue-Bad Schlema je wulke wokrjesne město, kotrež wuńdźe 2019 přez zjednoćenje města Aue a gmejny Bad Schlema. Lětsa swjeći měšćanski dźěl Aue swój 850-lětny jubilej wobstaća. Składnostnje tutoho so lětuši 29. Dźeń Saksow z jubilejom kombinuje.

Na 15 tematisce wšelakorych swjedźenskich šćežkach předstajeja so w Rudnohorinskim měsće sakske a regionalne wosebitosće. Aue płaćeše hač do kónca 20. lětstotka jako wuznamne hórniske a industrijne město. So poćahujo na tute stawizny je ze stron organizatorow lětsa samo rekord planowany: z najwjetšim chórom Sakskeje. Znajmjeńša 15.000 spěwarkow a spěwarjow chcedźa na swjedźenskej soboće we 18.00 hodź. zdobyć a zhromadnje znaty spěw hórnikow „Steigerlied“ zaspěwać. Jako hymna hórnistwa je hač do dźensnišeho popularna a spěwa so w aktiwnych a něhdyšich hórniskich kónčinach Němskeje. W měrcu tutoho lěta bu spěw do UNESCO-lisćiny imaterielneho kulturneho herbstwa přiwzaty.

„Dźeń Saksow“ je najwjetši swjedźeń sakskich towarstwow a zwjazkow a přewjedźe so z lěta 1992 sem. Nošer swjedźenja je kuratorij „Dźeń Saksow“, w kotrymž je tež Domowina z čłonom. Zastup je na wšěch dnjach darmotny.