Składnostnje „Rěčneje swětłownje”, stajneho serbskeho rozmołwneho koła we Wojerecach, je štwórtk, 22.9., wječor 16 zajimcow do bróžnje domu Domowiny přichwatało. Regionalna rěčnica Sonja Hrjehorjowa informuje, zo su wobdźělnicy z wulkim zajimom film wo serbskim kwasu w Ćisku z lěta 1950 hladali. Wězo dźěše w bjesadźe wo to, štó je na wobrazach widźeć a čeji prjedownicy to su a do kotrych wjeskow su so ludźo podali. Ale tež nałožki, kotrež so kołowokoło kwasa pokazachu, běchu tema zajimawych rozmołwow: Kak běše to tehdy, što z toho je so hač do dźensnišeho dźeržało?

Na přikład je scena filma pokazała, kak su wozy z kwasnymi hosćimi a z wěnom jěducy z cyrkwje před wjesku pozastali a towaršej běžitaj z piwowym karančkom tři króć wokoło wozow, na to móžachu so młody porik, družka a braška napić, doniž kadlej nimale wupity karan na zadnjej wósce njerozbištej – to měješe zbožo přinjesć. Rozmołwa wo nałožkach běše dobry zazběh do dalšeje temy – kermuša. Kožupanka Gabriela Linakowa je serbske přisłowa a teksty dokoławokoło kermuše přednošowała kaž „Widźiš-li kurjawu na łuce a na jězorach so warić, směš wěsće na rjane wjedro twarić.” Wšitcy je zhromadnje čitachu. So wě, zo su tež kaž na kwasach a na kermušach spěwali.

foto: Sonja Hrjehorjowa