Wuslědki 67. kongresa Federalistiskeje unije europskich narodow, kotryž wotmě so minjeny kónc tydźenja w madźarskim Pécs, žnějachu pozitiwny wothłós.

„Smy spokojom, zo je so naša rezolucija k woznamej prawostatnosće a demokratije, kotraž twori zakład škita mjeńšinow, z wulkej wjetšinu hłosow na FUEN-kongresu přiwzała. Jenož hdyž za demokratiju a prawnostatnosć zasadźujemy, móžemy sej jako mjeńšiny wěryhódnje škit a spěchowanje wužadać. Za to smy so jako FUEN nětko wuprajili“, tak předsydka towarstwa Sydslesvigsk Forening danskeje mjeńšiny w Němskej, Gitte Hougaard-Werner.

Něhdyša społnomócnjena za mjeńšiny, Renate Schnack ze Schleswigsko-Holsteinskeje, pokaza na kritiske wuwića w Madźarskej: „Hdyž so kraj hižo na prawidła Europskeje unije njedźerži a wobydlerki a wobydlerjo w tutym kraju hižo swoje prawa wužiwać njemóža, potom je to cyłoeuropske prašenje.“

Dohromady bu 12 rezolucijow schwalenych. Tež k situaciji na Ukrainje zapoda so rezolucija, kotraž zasudźuje Rusku wójnu w Ukrainje a sej kónc tuteje žada. „Smy wujasnili, zo ma Ruska hnydom a bjez wuměnjenjow Ukrainu wopušćić a wójnu zakónčić“, rozłoži jednaćelka Domowiny, Judit Šołćina. „Wot Krimskich Tatarow zhonichmy mjez druhim, što wójna a wobsadźenje Ukrainy za wobydlerjow woznamjenja“, tak Šołćina.

Jako čłon dźěłoweho zjednoćenstwa słowjanskich mjeńšinow wita Domowina nimo toho wotmysł, załožić dźěłowu skupinu k změnje statutow FUEN. Tuta ma hač do klětušeho namjet nadźěłać, kak móhli so rěčne skupiny w FUEN-prezidiju lěpje wotbłyšćować.

Klětu wotměje so kongres wot 19. do 22. septembra 2024 pola Sewjernych Frizow w Husumje.

Foto: FUEN