Přichodna hłowna a wólbna zhromadźizna Domowiny budźe 12. junija w ćěłozwučowarni Němsko-serbskeho šulskeho kompleksa w Slepom – to je zwjazkowe předsydstwo (ZP) třěšneho zwjazka pjatk wječor wobzamknyło. Gremij so zdobom ze stawom nastajenja kandidatow za nowowólby organow, z lisćinu hosći a podlěšenjom plana posedźenjow ZP a prezidija hač do spočatka noweje wólbneje doby zaběraše, wšako bu hłowna zhromadźizna pandemije dla wo dwaj a poł měsaca přestorčena. Jan Budar, direktor Załožby za serbski lud, rozkładźeše aktualny staw planowanja „Serbskeho foruma wědy při Lawskich hrjebjach” wosrjedź Budyšina, nowe stejnišćo Serbskeho instituta, Serbskeho muzeja Budyšin, zhromadneho pedagogiskeho poskitka a jako perspektiwu centruma digitalizacije. Předsyda Domowiny Dawid Statnik wočakuje „wulke wobohaćenje města a rjanu nitku serbskich institucijow wot ansambla přez forum wědy a Serbski dom hač do nakładnistwa.” Wobaj wobkrućištaj stajne spomóžne zhromadne dźěło załožby a Domowiny. Po planje chcedźa wot zwjazka a Sakskeje w ramiku změny strukturow financowany forum w juniju 2027 wotewrić.Schwaliło je zwjazkowe předsydstwo po diskusiji změnjeny naćisk dźěłowych směrnicow za dobu 2021-2023, wo kotrychž ma hłowna zhromadźizna dodiskutować a wothłosować. Prezidij dóstanje nadawk, sćěhowacy namjet Maćicy Serbskeje do směrnicow zadźěłać: „Hačrunjež je Domowina hižo loni nazymu zjawne stejišćo k planowanju składa za atomowe wotpadki w Hłownej Łužicy zabrała, mamy tola za wažne, zo so Domowina tež w přichodnych lětach k tomu wupraji a protestuje. Na kóncu je to mjenujcy politiski rozsud. Jenož potom, hdyž so wutrajnje a wótře protestuje, móžemy tomu zadźěwać, zo so tajki skład pola nas wutwori. Skład budźe tam, hdźež so - nimo geologiskich wuměnjenjow - najmjenje protestuje. To wšak je so tež pokazało při planach wotstronjenja putniskeje łuki w Róžeńće. Tohodla mamy za wažne, zo so tutón dypk do směrnicow přiwza.”Za kuratorij Myta Ćišinskeho pomjenowaše zwjazkowe předsydstwo Marion Stenselowu za Delnju a Manfreda Hermaša za Hornju Łužicu. Dalšich zastupjerjow maja někotre serbske towarstwa wolić. Dowuradźowało je ZP stejišćo Domowiny k naćiskej plana šulskeje syće wokrjesa Budyšin. Nimo retomasa wobsahowych přispomnjenjow je tež ducent pokiwow na skomolenje mjenow serbskich šulow přez pobrachowace diakritiske znamješka. Wažny dypk na wjacorych stejnišćach serbskich šulow je po měnjenju Domowiny potrjeba rozšěrjenja rumnosćow pedagogiskim nadawkam wotpowědujo. Na próstwu Jana Nuka je so ZP w aktualnej debaće wobchadźenju ze skupinu „Serbski sejm“ wěnowało. Městopředsyda Marko Hančik je wobkrućił, zo je so jeho wuprajenje w telewizijnym wusyłanju „Wuhladko“ (žadyn jednanski partner) eksplicitnje na temu změny strukturow w cyrkwjomaj poćahowało. Dawid Statnik pominaše na přeprošenje skupinje, w třěšnym zwjazku sobu skutkować – poł lěta pozdźišo pak přeco hišće wotmołwa njepředleži. Předsyda Domowiny, Dawid Statnik, informowaše wo swojimaj rozmołwomaj z Budyskim superintendentom Tilmannom Poppom a krajnym biskopom Ewangelsko-lutherskeje krajneje cyrkwje Sakskeje, Tobiasom Bilzom, w naležnosći fuzije Hodźijskeje wosady tež z wosadami zwonka serbskeho sydlenskeho ruma. Zdobom steji Statnik w stajnym kontakće z Hodźijskim fararjom a serbskim superintendentom Christophom Rummelom, a předsydu Serbskeho ewangelskeho towarstwa a městopředsydu Serbskeho wosadneho zwjazka, Matom Krygarjom. Zaměr je, serbske Bože słowo tež přichodnje w nowej cyrkwinskej strukturje kruće zakótwjeć (hlej tež nowinsku zdźělenku wo rozmołwje z biskopom).
Beata Brězanowa, nawodnica Rěčneho centruma WITAJ w nošerstwje Domowiny, so po posedźenju k diskusiji wo zwopradźenju žadanja zašłeje hłowneje zhromadźizny 2019 za wutworjenjom zwjazka serbskich šulow wupraja: „Zwjazk serbskich šulow w zmysle kooperacije mjez šulemi je so pod aspektami modernizacije šulow, kotrež po koncepće 2plus dźěłaja, tematizował. Prašenja modernizacije móhli so do ewaluacije koncepta 2plus zapřijeć, kotraž je wobstatk koaliciskeho zrěčenja. Wo móžnych koncepcionelnych wobłukach ewaluacije 2plus so tuchwilu hišće we wodźenskeje skupiny 2plus při SMK wuradźuje. Tuž je so Zwjazkowe předsydstwo w njezjawnym dźěle wo rozmyslowanjach informowało, zo móhli so naležnosći přiměrjene puće komunikacije, mjez druhim tež ze Serbskej radu, namakać.”