Předsyda Domowiny, Dawid Statnik, a Stephan Kühn, sakski zapósłanc Zelenych w zjwazkowym sejmje, staj so wutoru w Serbskim domje na dźěłowu rozmołwu zetkałoj. W srjedźišću steješe połoženje Łužicy a serbskeho ludu po pjatkownym wobzamknjenju zwjazkoweho sejma wo zakonjomaj za zakónčenje wudobywanja wuhla a zesylnjenje potrjechenych regionow. Dawid Statnik, předsyda Domowiny, so po rozmołwje wupraja: „Stephan Kühn je nam Serbam jako zapósłanc regiona a čłon poradźowaceho wuběrka za prašenja serbskeho ludu při zwjazkowym ministerstwje za nutřkowne ze spušćomnym partnerom. Wón běše tež Serbam poboku, kiž su krajne dźěłowe zjednoćenstwo ,serbske žiwjenje’ Zelenych w Sakskej załožili. Smój sej přezjednaj: Je wulke zbožo, zo so čas přesydlenjow brunicy dla nachila. Wěmoj, zo njesteji Łužica jenož před wulkimi socialno-hospodarskimi, ale tež ekologiskimi wužadanjemi. Za tučasnu strukturnu změnu Łužicy je namaj wažne, zo so wobdźělenske procesy towaršnosće tak zesylnja, zo so móžne rozsudy zhromadnje z potrjechenymi wuwiwaja. Jenož tak budźe móžno, wobydlerstwu lěpšiny a šansy strukturneje změny wuwědomić.”