Dźensa je so w Budyšinje kampanja Sakskeho statneho knježerstwa za image serbšćiny oficielnje zahajła. Předsyda Domowiny, Dawid Statnik, kiž přisłušnu ministerku za kulturu a turizm, Barbaru Klepsch (CDU), a dalšich wobdźělnikow na nowinskej konferency do Serbskeho domu witaše, praji k tomu:„W stawiznach běčhu hamtske kampanje wo temje serbšćiny bohužel přewažnje na to wusměrjene, zo bychu sej Serbja serbowanje wotwučili. Je nam wulke zbožo, zo dźensniši stat nas pozbudźuje, wšědny dźeń serbować, a w ludnosći wo sympatiju za serbšćinu wabi. Najebać wšě praktiske diskusije je nam to přičiny dosć, tutej kampani wjele wuspěcha přeć.”